Ааспыт сайын  Башкирияттан тигээйи 20 бөлөҕүн аҕалан, 21 уйаҕа туппуттара. Быйыл онтуларын элбэтэн, 40-50 уйаҕа тиэрдэр былааннаахтар. Орто сүһүөх кылаастартан уонча уол дьарыктанар. Кинилэри биология учуутала, дириэктэри агротехнологическай хайысхаҕа солбуйааччы Петр Саввич Федотов салайар.

“Биһиги сыалбыт диэн оҕолору тыа сирин үлэтигэр үөрэтии буолар. Уолаттар тигээйини кытта бодьуустаһалларын сөбүлүүллэр. Көрөллөр-истэллэр, ыраастыыллар, саахар сиробунан эбии аһаталлар, бэйэлэрэ мүөтү амсайан да ылаллар. Биир куруук ыалдьар уолбутугар быйыл тумуу да сыстыбата. Оннооҕор тигээйи тигэрэ эмтээх дииллэр, апитерапия диэн ааттанар”, -- диэн кэпсиир Петр Саввич. Оҕолор сайын устата тигээйилэрин кэтээн көрөн баран, кыһын научнай-практическай конференцияларга ситиһиилээхтик кыттыбыттара.

Мүөттэрин Хотугулуу-Илиҥҥи федеральнай университет лабораториятыгар илдьэн анализтаппыттарыгар, Алтай, Амур мүөттэринээҕэр быдан туһалаах диэн буолбут.

Билигин тигээйилэр анал дьиэҕэ утуйа сыталлар. Бу кэмҥэ дьиэҕэ халбаҥнаабат анал температураны тутуһуу ирдэнэр. Оттон оҕолор аны сайын Уфа куоракка “Юный пчеловод” куонкуруска барарга бэлэмнэнэллэр.