Бүгүн СР Правительствотын иһинэн үлэлиир Дьокуускай куораттааҕы 1 №-дээх ЗАГС управлениетын салайааччы Тамара Кривошапкинаттан, төһө төрөппүт оҕотугар сахалыы ааты биэрбитин туһунан ыйыталастыбыт.

Тамара Николаевна иһитиннэрбитинэн, Дьокуускайга 2014 сылга уопсайа 3848 оҕо күн сирин көрбүт. Онтон 1955 - уол, 1893 – кыыс. Төрөппүттэр кэнники кэмҥэ уолаттарга ордук Эрсан, Айсен, Айтал, Дархан диэн ааты сөбүлээн биэрэр буолбуттар. Оттон кыргыттарга Күннэй, Сайаана, Сардаана диэн ааттары иҥэрии элбээбит. Ааспыт сылга 13 улахан киһи аатын сахалыыга уларыппыт.

Маны сэргэ, 2012 с. муус устар 25 күнүнээҕи “О присвоении фамилии и отчества ребенку в соответствии с якутскими национальными обычаями при государственной регистрации рождения” Сокуоҥҥа олоҕуран, 12 оҕоҕо аҕатын туһунан суруллар графаҕа эбии «уола», «кыыһа»диэн суруйтарбыттар.