«Якутия» ФАПК оҥорон таһаарар арыгылаах бородууксуйаларыгар Эллэй, Тыгын, Сайсары, Олоҥхо, Байанай, бэл саха кыргыттарын ааттарын туруорар. Бу туһунан өрөспүүбүлүкэ хаһыаттарыгар (ол иһигэр, «Саха сирэ» хаһыакка) уонна интернет-таһаарыыларга хаста да суруйан тураллар.

Өрөспүүбүлүкэ общественноһа норуот аатыгар маннык ытыктабыла суох сыһыантан долгуйарын уонна сөбүлэспэтин туһунан биллэрэр. Эллэй уонна Тыгын саха норуотун чулуу дьонунан, Сайсары күөл өбүгэлэрбит олорбут ытык сирдэринэн, Олоҥхо аан дойду билиммит уһулуччу айымньытынан, Байанай дэлэй уонна ситиһиилээх булт бэлиэтинэн буолаллар. Саха норуотун ытык өйдөбүллэрин арыгы бородууксуйатыгар туһаныы бу тыллар дьиҥнээх суолталарын түһэрэр, бутуйар, үүнэр көлүөнэ өйүгэр-санаатыгар охсуулаах буолара биллэр.

Эдэр дьон кинилэри төһө билэллэрин туһунан интэриэһиргээн ыйытан көрдүбүт. Онуоха сорох ыччат «Эллэй, Олоҥхо, Байанай диэн кимнээҕий?» диэн ыйытыкка «Эргиэн киинэ. Пиибэ. Буокка» уо.д.а. эппиэттээтэ. Туйаара уонна Сардаана диэн ааттар арыгыга иҥэриллэллэрэ саха кыргыттарыгар ытыктабыллаах сыһыан суоҕун көрдөрөрүн, сүөргү сыһыаҥҥа тиэрдиэн сөбүн билэллэр.

«Өрөспүүбүлүкэҕэ чөл олох политиката киэҥник ыытыллар, арыгыны атыылыыр бириэмэ хааччахтанар, сонуну киэҥник тарҕатар ситимнэргэ чөл олох туһунан киэҥник сырдатылла, кэпсэнэ турар кэмигэр итирдэр утахтары олохтоох оҥорон таһаарааччы норуот ытык өйдөбүлүгэр, символларыгар уонна историческай сыаннастарыгар ытыктабыла суох сыһыанын көрдөрөр. Итинэн сибээстээн, биһиги салҕанан тахса турар өйү-санааны, иэдээннээх куорҕаллааһыны тохтоторго бары күүспүтүн түмэргэ ыҥырабыт.

Биһиги, общественнай тэрилтэлэр, бу кыһалҕаны норуот талбыт депутаттара, общественноһы кытыннаран, ытык тыллар тустарынан статуһу ылыналларыгар уонна «Төрүт ытык өйдөбүллэри» сокуон таһымыгар быһааралларыгар ыҥырабыт. Инникитин историяны кэрэһилиир тыллары уонна сахалыы ааттары «Якутия» ФАПК ААО арыгылаах бородууксуйатыгар туһаныыны тохтотуоҕуҥ уонна бу боппуруос быһаарылларыгар эрэнэбит», – диэн Ыҥырыыга этиллэр.