Ырытыы көрдөрбүтүнэн, маннык ыар буруйдар сиэртибэлэринэн, сүрүннээн, табыллыбатах олохтоох ыал оҕолоро буолаллар итиэннэ кинилэри атаҕастыыр (күүһүлүүр, кырбыыр, муҥнуур) киһийдэхтэринэн кинилэр чугас дьонноро (төрөппүттэрэ, аймахтара, эппэкииннэрэ, дьиэ кэргэн атастара-доҕотторо) буолаллар.

Бу соторутааҕыта биир маннык ыар буруйу Ньурба улууһун прокуратурата булан, бэрэбиэркэ ыыппыт. Бэрэбиэркэ быһаарбытынан, С. диэн ыаллар иитэ ылбыт оҕолорун - 2 саастаах уолчааны – ыстааныгар ииктиирин иһин сорун сордообуттар. Бу барахсаны балыыһаҕа көрдөрөн эмтэтиэхтэрин оннугар, бэйэтин кыайан көмүскэммэтин өйдүү-өйдүү, кырбыы-охсо сылдьыбыттар. Ону ааһан, ийэ буолуохсут оҕо кулгаахтарын, половой уорганын хайыта тардар адьынаттаах эбит. Ол курдук сылы быһа муҥнаабыттар (былырыын муус устар ыйтан). Маныаха бу дьон түөрт бэйэлэрин оҕолоругар итинник кырыктаахтык сыһыаннаспаттар эбит.

Прокуратура бэрэбиэркэтин матырыйаалларыгар олоҕуран, улуустааҕы полиция дознаниетын отдела муус устар 18 күнүгэр бу кэргэнниилэргэ РФ Холуобунай кодексатын 156-с ыстатыйатынан холуобунай дьыала тэрийбит. Ол эбэтэр, сокуоннай сааһын ситэ илик оҕону иитэр эбээһинэһин толорбот буолуу уонна оҕоҕо кырыктаахтык сыһыаннаһыы бэлиэтэ баарынан. Бу ыстатыйанан көрүллэр сүрүн накаастабыл миэрэ – күһэлэҥ эбэтэр көннөрүнэр үлэҕэ ууруу.

Бу чахчыны Ньурба прокуратурата булбутунан, улуус прокурора Артем Ильиҥҥэ сибээскэ тахса сырыттыбыт: 

- Артем Романович, билигин ити оҕо ханна баарый, доруобуйатын туруга хайдаҕый?

- Муус устар 6 күнүгэр улуус дьаһалтатын эппиэкэҕэ уонна попечительствоҕа уорганнара ити чахчыны билэн баран, тута биһиэхэ биллэрбиттэрэ. Иһитиннэриилэри атастаһар, бииргэ үлэлэһэр туһунан түһэрсибит сөбүлэһиибитигэр олоҕуран. Тута бэрэбиэркэ ыыппыппыт, полиция кыттыспыта. Ол түмүгэр, холуобунай дьыала тэриллибитэ.

Ити чахчы биллибит күнүгэр эппиэкэ уорганнара оҕону тута былдьаабыттара, икки күнүнэн кинини атын ыал иитэ ылбыта. Оҕо доруобуйата билигин этэҥҥэ эрээри, улахан психологическай травма ылбыт: киһиттэн куттана сылдьар буолбут, кимиэхэ да тыыттарбат, чугаһаатахтарына тута ытаабытынан барар.

- Иһитиннэриигэ этиллэринэн, ити төрөппүттэр буолуохсуттар кырачаан эрэйдээҕи сылы быһа муҥнаабыттар. Ама, уһун сыл устатыгар ким да итини билбэккэ-көрбөккө сылдьыбыт дуо?

- Билэ сылдьыбыттар эрээри, болҕомтолорун уурбатахтар, полицияҕа биллэрбэтэхтэр. Биһиги улуустааҕы балыыһа кылаабынай бырааһын аатыгар прокурорскай представление ыыттыбыт. Учаастактааҕы педиатр-быраас ити ыалга кэлэ сылдьар эбит да, үрдүнэн-аннынан көрөр эбит. Кини дьайыыларыгар дьалаҕай быһыы бэлиэтэ баар. Бу дьыаланы тиһэҕэр диэри хонтуруоллуохпут.

Туһалаах төлөпүөннэр:

РФ СК Саха сиринээҕи управлениетын “Ребенок в опасности” төлөпүөнэ -- 8(4112)40-32-37;

Сокуоннай сааһын ситэ илик оҕолорго көмөлөһөр сыаллаах өрөспүүбүлүкэтээҕи “Мобильнай кризиснай сулууспа” -- 8-800-200-2283.   Бу сулууспа үс -- социально-психологическай, медицинскэй уонна юридическай – хайысханан үлэлиир.