Нэһилиэккэ подстанциялар кыамталара кыратыттан, баҕалаах эрэ барыта уотунан ититиигэ холбонор кыаҕа суох. Аны кыра тыал, күүстээх ардахтар түстэхтэринэ остуолбалар суулланнар үгүс кыһалҕаны үөскэтэллэр. Онон оһохторун көтүрбүт ыаллар, уот уһуннук бардаҕына, дьиэлэрэ тоҥор кутталлаах.

Кытыы, мөлтөх суоллаах-иистээх нэһилиэктэр ордук эрэйдэнэллэр. РЭС үлэһиттэрэ тута кэлбэттэр, хас да күн кэтэһиннэриэхтэрин сөп. Холобур, түбэйдэр сылга суоттаан таһаардахха, биир ый кэриҥэ уота суох олороллорун нэһилиэк баһылыга чопчулаан бэлиэтээтэ. Саҥа дьыл кэннэ уоттара 11-дэ арахса сылдьыбыт. Сайыҥҥы өттүгэр саахал тахсар түгэнигэр энергетиктэр Түбэйгэ Бүлүү өрүһү иккитэ туораан тиийиэхтэрин наада. Паром, мотуордаах оҥочо суох буоллаҕына, олох даҕаны хаайтараллар.

Манна туһаайан СӨ олоҕун-дьаһаҕын уонна энергетикэтин министрин солбуйааччы Гаврил Левин улуус иһинээҕи уот хаһаайыстыбатын чөлүгэр түһэрэргэ 3.5 млрд солк. наадатын эттэ. Билигин үп-харчы суоҕунан, бу боппуруос салгыҥҥа ыйанан турар. Онон Сунтаарга төһө даҕаны үрдүк күүрүүлээх уот үлэҕэ киирдэр, тыа сирин кыһалҕатын толору быһаарар кыаҕа суох.