- Чурапчы улууһун Болтоҥо сэлиэнньэтин олохтооҕо Ирина Павлова оҕуруот аһын олордуунан сөбүлээн дьарыктанар. Кини Саха сиригэр эрэ үүнэр үүнээйилэринэн муҥурдаммат - 2013 сыллаахха итии дойдуларга үүнэр винограды олордон боруобалаабыта.
- Тиэргэнигэр винограды хайдах олордубутун туһунан Ирина Павлова СИА корреспонденыгар: “Мин оҕуруотчуттарга аналлаах сурунааллары мэлдьи суруттарабын. Онно виноград угун суруттарыахха сөбүн туһунан ааҕан баран, Интернетинэн суруттарбыппар, муус устар саҥатыгар кэлбитэ. Ити иллэрээ сыллаахха этэ. Бастаан дьиэҕэ иһиккэ олордубутум. Ыам ыйын бүтэһигэр сылаас теплицаҕа таһаарбытым. Уктан тута икки салаа үүнэн тахсыбыта. Биирэ ситэри сайдыбатаҕа, биирэ отонноммута. Атырдьах ыйыгар диэри биир сүүмэх виноград үүммүтэ”, - диэн эттэ.
- Ирина Афанасьевна ылсыбыт дьыалатын салгыы сайыннарар сыал-сорук туруоруммут. Күһүн виноградын угун оҥкучахха харайбыт. “2014 сыл сыл саас бастаан угу дьиэ иһигэр олордон бүөбэйдээбитим. Таһырдьа олордуом иннинэ, хара буору, кумаҕы, илдьиритиллибит элбэх сымыыт хаҕын уонна күлү булкуйан, буорун бэлэмнээбитим. Бу сырыыга аһаҕас халлаан анныгар олордубутум, кытыытынан эрэ сабыталаабытым. Нэдиэлэҕэ иккитэ уу кутарым. Күһүн 20 сүүмэх винограды ылбытым. Амсайбыт дьон бары олус минньигэһин уонна симэһиннээҕин бэлиэтээбиттэрэ”, -- диэн кэпсиир Ирина Павлова.
- Кини быыстапкаларга кыттан дьон-сэргэ биһирэбилин ылбыта. Оҕуруотчуттар Ирина Афанасьевна телефонун бэйэ-бэйэлэриттэн ыйыталаһан, араас сэдэх үүнээйилэри хайдах олордор туһунан сүбэ көрдөөн эрийэр буолбуттар. Манна даҕатан эттэххэ, Ирина Афанасьевна тиэргэнигэр сайынын 70 көрүҥ сибэкки силигилиир, оҕуруот аһын арааһаүүнэр. Быйыл виногрдын угун оҥкучахтан олунньу 23 күнүгэр таһаараары сылдьар. Итиэннэ Интернетинэн виноград атын көрүҥнэрин суруттарбыт. Ирина Павлова тиэргэнигэр аны кыһыл отонноох виноград үүнэрин кэтэһэбит.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети