Хаандыгаҕа тыа хаһаайыстыбатын табаарын оҥорон таһаарааччылар социальнай өйөбүлүнэн туһаналлар

Хаандыгаҕа Ыҥаа, Байаҕантай, Мэҥэ Алдан, Томпо, Охотскай Перевоз нэһилиэктэрин, Хаандыга бөһүөлэгин бэрэстэбиитэллэрэ кыттыылаах тыа хаһаайыстыбатын табаарын оҥорон таһаарааччыларын мунньаҕа буолла. Семинарга нолуок сулууспатын, Нэһилиэнньэ дьарыктаах буолуутун киинин, социальнай харысхал управлениетын, Предпринимателлэри өйүүр киин, Россельхозбанк, Роспотребнадзор уо.д.а. специалистара кыттыыны ыллылар.


Бэйэ дьыалатын саҕалыырга бастатан туран үп наада. Россельхозбанк кредит араас көрүҥнэрин биэрэр, ол гынан баран оройуоҥҥа кредити ылыы көҕө суох, 2014 сылга техниканы атыылаһыыга икки эрэ кредит бэриллибит, олор сабыллыбыттар. «Илгэ» ТХПК үүт собуотун туттарыгар 2016 сылга диэри ивестиционнай кредитинэн туһанар. Бааһынай хаһаайыстыбалар кэлэн ыйыталаһаллар уонна бары докумуон хомуйуутугар тиийэн тохтоон хаалаллар. Ону сэргэ аан дойдуга бүрүүкээбит кризиһинэн сибээстээн Россельхозбанк бырыһыанын 20-тэн 29% диэри улаатыннарда.
Маннык түгэҥэ тыа хаһаайыстыбатын бородууксуйатын оҥорон таһаарыччыларга социальнай өйөбүл олус наадалаах. 2014 с. 17 ыалы кытта 2800 тыһ. солк. суумалаах социальнай контракт түһэрсиллибит. Кэтэх хаһаайыстыбаны сайыннарыыга тоҕус ыал көмө ылла: биэс ыал Кытай «Синтай» мини-тракторын ыларга, Мэҥэ Алдантан икки ыал ынах сүөһү, Кириэс Халдьаайыттан икки ыал биэ атыылаһарга.
Нэһилиэнньэҕэ өҥөнү оҥорооччулар эмиэ социальнай өйөбүлүнэн туһаныахтарын сөп. Ол курдук, Мэҥэ Алдантан икки ыал уонна Кириэс Халдьаайыттан биир ыал мини-пилорама ылыннылар. Кириэс Халдьаайыга биирдиилээн ыал тигиинэн уонна хаартыска өҥөтүнэн дьарыктаныыны ылыстылар.
Дьарыктаах буолуу киинин нөҥүө «Илгэ» ТХПК, «Быйаҥ» ТХПК уонна бааһынай хаһаайыстыбалар сайыҥҥы кэмҥэ үлэтэ суохтары быстах үлэҕэ ылаллар. «Илгэ» ТХПК инбэлиити үлэнэн хааччыйда. Киин сүнньүнэн үлэтэ суохтары Нерюнгрига, Дьокуускайга, Чурапчыга үөрэттэрии ыытыллар.
Республика уонна оройуон өттүттэн оҥорон таһаарааччыларга ботуччу көмө оҥоһуллар. 2014 с. олохтоох бюджеттан 7 332 580 солк субсидия бэриллибит, государственнай бюджеттан – 44753589,16 солк. Сүөһүнү иитиини өйөөһүҥҥэ – 9860000 солк., үүтү тутууга – 14196612,5 солк., сылгыны иитиигэ – 685400 солк., базовай сибиинньэни иитиигэ – 162 тыһ. солк., оҕуруот аһын үүннэриигэ – 329425,30 солк., хортуоппуйу олордууга – 271012 солк., сүөһү аһылыгын бэлэмниир кампанияҕа – 498739,4 солк. Оройуон дьаһалтатын өйөбүлүнэн кэлиҥҥи сылларга түөрт хотон тутулунна, Хаандыгаҕа овощехранилище тутуута саҕаланна о.д.а. Тыа хаһаайыстыбатын табаарын оҥорон таһаарааччылар чопчу бизнес-былаанынан үлэлиэхтэрин, атын хайысхалары, холобур, балыктааһыны, отон хомуйуутун о.д.а. баһылыахтарын наада. Бу барыта тыа хаһаайыстыбатын бородууксуйатын оҥорон таһаарыыны үрдэтиэхтээх.