Бу сокуону ырытыһыыга «Нам улууһа» уонна «Ленскэй нэһилиэк» МТ баһылыгын социальнай боппуруостарга солбуйааччылар Венера Дьяконова, Андрей Бочкарев, Нам улууһун сокуоннай саастарын ситэ илик оҕолор дьыалаларыгар хамыһыйа эппиэттиир сэкирэтээрэ Анна Кутукова, ИДьО старшай инспектора Любовь Атласова, I Хомустаах баһылыга Василий Жирков, Хатыҥ Арыы нэһилиэгин баһылыга Юрий Слепцов, II Хомустаах баһылыга Афанасий Дмитриев, опека уонна попечительство отделын начальнига Мария Петрова, Намнааҕы киин балыыһа педиатра Евдокия Захарова, СР Ыччат социальнай-психологическай өйөбүлүн киинин Намнааҕы филиалын сэбиэдиссэйэ уонна „Нам улууһа“ МТ оҕо быраабын көмүскүүр боломуочунайа Анна Васильева, I Хомустаах оскуолатын дириэктирин иитэр үлэҕэ солбуйааччы Анна Федорова уонна Нам 1 №-дээх оскуолатын төрөппүттэрин кэмитиэтин бэрэссэдээтэлэ Евдокия Рожина иһитиннэрии оҥордулар.

Мунньах кыттыылаахтара бэйэлэрин санааларын эттилэр. Үөрэнээччи быраабын эрэ буолбакка, эбээһинэһин эмиэ толору билиэхтээҕин, дьиэ кэргэн арыгы иһиитин хонтуруолга тутары; оҕону иитиигэ сүрүн оруолу ийэ, аҕа (дьиэ кэргэн) ыларын, кыыс-уол сыһыаннаһыытын өйдөтүүгэ утумнаах үлэни, бэсиэдэлэри ыытары, оҕолору детсадтан саҕалаан үлэҕэ сысталларын курдук иитэри, үөрэнээччилэри ырыанан-тойугунан эрэ буолбакка, үлэнэн уонна айылҕаны кытта алтыһыннаран талааннарын сайыннарары, „Основы предпринимательство“ диэн практическай хабааннаах предмети киллэрэр буоллар туһалаах буолуо этэ диэн бэлиэтээтилэр.

Хатыҥ Арыы нэһилиэгин баһылыга Юрий Слепцов СИА корреспонденыгар: „Үөрэнээччилэр бырайыактарынан нэһилиэктэрбитигэр чөл олоҕу пропагандалыыр социальнай рекламалар (оҕолор уруһуйдара) оҥоһуллубуттара. Нэһилиэккэ бастыҥ үөрэнээччилэргэ, спортсменнарга, активистарга „Рождественский бал“ диэн биэчэри тэрийэбит, идэҕэ туһаайар хабааннаах „День дублера“ диэн тэрээһини ыытабыт, онно оҕолор тэрилтэлэргэ биир күн сылдьан үлэни-хамнаһы билсэллэр, сайыҥҥы сынньалаҥҥа араас хайысхалаах лааҕырдары тэрийэбит“, диэн эттэ.

II Хомустаах баһылыга Афанасий Дмитриев: „Нэһилиэкпитигэр биэс сыллаах программа оҥоһуллан, 2014 сылы —Чэбдик сылынан ааттаабыппыт, оттон 2015 сылы Дьиэ кэргэн сылынан биллэрдибит. Бу программа чэрчитинэн, нэһилиэнньэҕэ, оҕолорго, үөрэнээччилэргэ, төрөппүттэргэ о.д.а. араас хайысхалаах үлэлэр ыытыллаллар“, - диэтэ.