Кини үйэтин тухары ыанньыксыттаабыта, Үлэ Албан аатын III степеннээх уонна үлэ Кыһыл Знамята уордьаннар кавалердара, Томпо улууһун Ытык киһитэ. Анна Петровна аата Тыа хаһаайыстыбатын министерствотын Бочуотун кинигэтигэр киллэриллибитэ. Кини билигин да тэп курдук, оҕолоругар, сиэннэригэр, хос сиэннэригэр өйөбүл буолар. Ыал ийэтэ Татьяна Ворогушина «Сахаайа» муода театрыгар кыргыттары дьарыктыыра. Оттон аҕалара Олег Фролкин Узбекистан Ташкент куоратыттан төрүттээх нуучча эрээри, сахалыы өйдүүр. Оҕолоро оскуолаҕа бастыҥнар кэккэлэригэр сылдьыбыттара. Кыыстара Снежана Фролкина «Мисс Республика Саха Якутия» куонкуруска кыттан «1 вице-мисс Республики Саха Якутия» ааты ылбыта.

Ааспыт сыл сэтинньитигэр Дьокуускай куоракка мас тардыһыытыгар аан дойду чемпионата ыытыллыбыта. Онно биир дойдулаахпыт, СР спордун маастара, Саха сирин чемпиона, 2014 с. норуоттар икки ардыларынааҕы турнир чемпиона Сергей Фролкин кыттыыны ылбыта. Кини Чурапчытааҕы спорт-оскуоланы бүтэрбитэ, Чурапчы хамаандатыгар волейболга оонньуура. Дьокуускайдааҕы тыа хаһаайыстыбатын академиятыгар үөрэнэ киирэн баран, бэйэтэ баҕаран туран мас тардыһыытынан дьарыктаммыта. Аан дойду чемпионатыгар Сергей 105 кг ыйааһыҥҥа боруонса призерунан буолла. Тренерэ - спорт маастара, СР аҕыс төгүллээх, Россия сэттэ төгүллээх чемпиона Евгений  Сивцев.

Снежаналаах Сергей убайдара Петр Ворогушин - Дорҕоон Дохсун диэн аатынан биллэр эдэр бэйиэт. Бу уол иккис кинигэтин таһаартарарыгар Суруйааччылар сойуустара сертификат туттарбыта. Саһылтан төрүттээх талааннаах ыччатынан киэн туттабыт.

Бырааттара Игорь "Уолан ааҕыылара» өрөспүүбүлүкэтээҕи куонкуруска Гран-при хаһаайынынан буолбута. Саамай кыра уол Тимур «Кэскилчээнэ» оҕо уһуйаанын иитиллээччитэ.
Үтүө үгэстээх интернациональнай ыал сайын ахсын оттоон-мастаан, сир астаан, бэл тутууга үлэлээн ситиһиилэнэр.