Таһаҕас таһар улахан самолетунан хас да чаас көттүбүт. Самолеппут түспүтүн кэнниттэн уһун түүнү быһа көтөр балаһаҕа сыппыппыт. Онно эрэ билбиппит биһиги Афганистаҥҥа кэлбиппитин. Миигин 41176 гвардейскай байыаннай чааска минометнай чааска командирынан анаатылар. Эһигини итиэннэ Майабын олус күүскэ ахтабын. Биирдии байыаска иккилии фляга уу биэрэллэр. Күнүһүн олус куйаас, түүнүн тыбыс-тымныы. Миэхэ, хоту үөскээбит киһиэхэ, манна барыта саҥа уонна ураты курдук. Сэрии диэн дьулааннаах баҕайы… Сулууспалаан бүттэхпинэ үөрэхпин салгыаҕым…».

«Ытым оҕото хайдах сылдьар? Тиийдэхпинэ бултуурга үөрэтиэҕим. Мээнэ үлбүрүйүмэҥ. Суруккутун кэтэһэбин. Сорохтор нэдиэлэҕэ уоннуу суругу туталлар. Ымсыырабын эрэ. Чэ, бакааларын. Эһиги уолгут Василий Захаров». Бу саллаат Василий Захаров суруктара.

«Сэрии диэн дьулааннаах баҕайы…». Ити этиини «Жаркое лето в Кабуле», «Зверь войны», «Афганский излом», «Афганистан-2» диэн уо.д.а. киинэлэри көрбүттэр эдэркээн саллааттар умайар уот кутаа ортотугар сылдьыбыттарын сүрэхтэринэн ылыммыт буолуохтаахтар. 10 сыл устатыгар Афганистан сэриитигэр 620 тыһыынча саллаат кыттыбыта, 15 тыһыынча кэриҥэ өлбүтэ, 55 тыһыынчата бааһыран-эчэйэн эргиллибитэ диэн буолар.

Захаровтар Майаҕа Советскай уулуссаҕа олороллоро. Аҕалара Василий Яковлевич ОдьКХ-ҕа 40 сыл суоппардаабыта. Ийэлэрэ Светлана Никаноровна ОДьКХ итиэннэ культура отделыгар пенсияҕа тахсыар диэри үлэлээбитэ, эдьиийдэрэ наука кандидата Варвара Романова, технолог Елена Кириллина, убайа суоппар Владислав Захаров билигин үлэ-хамнас үөһүгэр сылдьаллар.

Вася Захаров үөрэнэр сылларыгар тустуунан утумнаахтык дьарыктаммыта. 16 саастааҕар маастарга кандидат норматын толорбута.

Тренердэр Василий Уваровка, Иннокентий Колосовка эрчиллибит Василий Эверстов, Владимир Яковлев, Егор Санников, Андрей Артемьев уо.д.а. Вася Захаровы олус истиҥник ахталлар-саныыллар. «Күүһүн-кыаҕын билинэн «Черномор» диэн таптаан ааттыырбыт. Дальнай Восток, Красноярскай, Нальчик куораттарынан тустубута, бириистээх миэстэлэргэ тиксэрэ, сэргэх, мэлдьитин үөрэ-көтө сылдьар, эрэллээх доҕор, табаарыс этэ. Москваттан, Узбекистантан, Афганистантан суруйсар буолара», - дэһэллэр кинилэр.

Василий Майа орто оскуолатын бүтэрээт, Москваҕа тыа хаһаайыстыбатын техникумугар үөрэнэр сылларыгар тустуунан, самбонан дьарыктаммыта. 1982 с. күһүнүгэр армияҕа ыҥырыллан, Горьковскай уобалас Мулино дэриэбинэтигэр сулууспатын саҕалаабыта. Младшай сержант Василий Захаров Узбекистаҥҥа минометнай отделениеҕа командир буолбута, самбоҕа инструктордаабыта.

‒ 1983 с. Саҥа дьылга уоппускатыгар кэлэ сылдьыбыта, ‒ диир бииргэ төрөөбүт убайа Владислав Захаров. ‒ Биир ый сынньанан доҕотторун, табаарыстарын кытта көрсөн бэркэ астыммыта. Уоппуската бүтэн, сулууспалыыр полкатыгар тиийбитигэр икки хоннороотун, Афганистаҥҥа утаарбыттар этэ.

Василий 1984 с. күһүнүгэр, бука, иһэр ууларыгар афганнар дьаат да куппуттара буолуо, сүһүрэн ыалдьан Сочига икки ый эмтэммитэ. Хаста да контузияламмыта. Армияттан эргиллэн кэлэн, Москваҕа охотовед үөрэҕэр үөрэммитэ. Дойдутугар кэлэн Лоомтукаҕа, Майаҕа охотинспекцияҕа үлэлээбитэ. 2004 ‒ 2007 сс. «Амма» заповедникка егердээбитэ. Айылҕаны харыстааһыҥҥа, браконьердары тутууга актыыбынайдык үлэлии сылдьан 2007 сыл тохсунньу 7 күнүгэр сураҕа суох сүппүтэ.

Ити үлүгэрдээх сэриини-уоту ортотунан этэҥҥэ сылдьан баран, эйэлээх кэмҥэ суорума суолламмыта саныахха олус ыарахан…

«Туойуоҕуҥ Ийэ сиргэ

Төлөммүт иэһи,

Туойуоҕуҥ сүрэх аайы

Төлөммүт иэһи», ‒ диэн С.Р.Кулачиков ‒ Эллэй «Гастелло» диэн хоһооно тыллара быйыл 50 сааһын эрэ туолуохтаах афганец-буойун Василий Васильевич Захаровка сыһыаннаах курдук саныыбын.