Тиит Арыы нэһилиэгин баһылыга Степан Соловьев:

1. Кыстыгы этэҥҥэ туораан эрэбит, сылгыһыттары кытта кэпсэтэ сырыттым. Биһиэхэ аҕыс бааһынай хаһаайыстыба баар. Ынах сүөһү эмиэ этэҥҥэ, билигин саҥардыы төрөөн эрэллэр. Сүөһү-сылгы аһылыга баар.

2. Быйыл этэҥҥэ ааһара буолуо дии саныыбын. Сааскы өттө уһуоҕа, тымныйыаҕа. Хаар халыҥ, уу элбэх буолуоҕа, муус чараас ,онон кэмигэр этэҥҥэ барыаҕа. Ол да буоллар сылын аайы буоларын курдук, бэлэмнэнии-сэрэтии үлэтин ыытабыт. Чкаловтан оҕолору-кырдьаҕастары аҕалыахпыт, сылгыларбытын, сүөһүлэрбитин үрдүк сиргэ таһаартыахпыт.

3. Былырыын ОДьКХ Хаҥаластааҕы филиала 8, «Хангаласгазстрой» 5 дьиэни сылааска холбообуттара. Быйыл бу икки тэрилтэ көмөтүнэн 20-чэ дьиэни сылааска холбуур былааннаахпыт.

Тумул нэһилиэгин баһылыга Родион Иванов:

1. Кыстык этэҥҥэ ааһан эрэр. Булчуттарбыт үс бөрөнү бултаатылар. Максимов Алексей Саҥа дьыл кэннэ биири, Буотаматтан Семенов Василийдаах биир тыһы бөрөнү киллэрбиттэрэ. Бу аҕыйах хонуктааҕыта Герасимов Герасим бултаабыт бөрөтүн дьон ылбытын ыйыталаһа-туоһулаһа сылдьабыт. Билигин тыаҕа өссө аҕыс бөрө баара биллэр, арыыга сылдьар сылгыларбытыгар кутталлаахтар, олортон сэрэнэбит.

2. Сааскы халааҥҥа былаан быһыытынан бэлэмнэнэбит. Сылгы 50-60% эбии аһылыкка турар. Халаан уута этэҥҥэ аастар диэн баҕа санаалаахпыт.

3. Аны сайын түөрт ыалы сылааска холбуурга былаанныыбыт. Олорор дьиэ-уот, коммунальнай хаһаайыстыбатын Хаҥаластааҕы салаатын кытта ыкса үлэлиибит. Билигин докумуонун бэлэмнии сылдьабыт.

Үөдэй нэһилиэгин баһылыга Прокопий Латышев:

1. Тыа хаһаайыстыбатыгар былырыын бырагыраама оҥостубуппут. Сүөһүнү аҕыйаппат туһугар, дьон уулаах ынаҕы атыылаһар буоллахтарына дьаһалта 50% төлүүр диэн. Итиннэ быйыл 100, кэлэр сылга 200 тыһ. солк. көрүөхпүт. Ынахтар саҥардыы төрөөн эрэллэр.

2. Быйыл хаар халыҥ курдук. Сааскы халааҥҥа былаан быһыытынан үлэ барыаҕа.

3. Былырыын 20 ыал кииннэммит ититэр тиһиккэ холбоммута. Быйыл 41 дьиэни сылааска холбуурга былаанныыбыт.

V Малдьаҕар нэһилиэгин дьаһалтатын баһылыгын солбуйааччы Лилия Самсонова:

1. Быйылгы кыстыгы этэҥҥэ туоруохпут дии саныыбын. Нэһилиэкпитигэр 292 хороҕор муостаах баар, онтон 92 ынах сүөһү. 18 ынах төрөөтө. 400-тэн тахса сылгы баар. Оппут быйыл дэлэй. Сылгы туруга орто.

2. Сааскы халаан уутугар сыл аайы бэлэмнэнэбит, үөрүйэхпит. Хас биирдии киһи халаан уутугар тугу гыныахтааҕын билэр, сэрэтэр лиис тарҕатыллар. Нэһилиэкпитигэр дьон быстах кэмҥэ олорор икки пууна үлэлиир. Биирэ кулууппутугар баар, манна 100 киһиэхэ суоттанабыт уонна балыыһабытыгар, онно халаан кэмигэр 10 киһи олоруон сөп.

3. Былырыын ОДьКХ хайысхатынан үс дьиэ сылааска холбоммута. Быйыл былааҥҥа биэс дьиэ баар. Итилэр оскуола хочуолунайыгар холбонуохтаахтар. Сэлиэнньэбит турар сирэ табыгаһа суох буолан, кииннэммит ититэр тиһиккэ холбонуохтаах дьиэбит аҕыйах.

Иһит нэһилиэгин баһылыга Михаил Тетерин:

1. 387 сыспай сиэллээх уонна 137 хороҕор муостаах ,ол иһигэр 58 ынах сүөһү кыстаан турар. Төрүөх саҥа саҕаланан эрэр. Оппут тиийэр, оттон эбии аһылыкка комбикорму ыаллыы нэһилиэктэри кытта кыттыһан аҕалтарыахтаахпыт.

2. Халааҥҥа бэлэмнэнэбит. Ыксаллаах быһыы-майгы министиэристибэтиттэн сорудахтар кэлэ тураллар. Туох итэҕэс-быһаҕас баар буолуон быһаарабыт.

3. ОДьКХ Хаҥаластааҕы салаатын кытта быйыл аан бастаан олорор дьиэлэри кииннэммит ититэр тиһиккэ холбуур үлэни саҕалыахтаахпыт. Онон, уонча дьиэни холбооторбут диэн баҕа санаалаахпыт. Кыттыгас үбүлээһиҥҥэ 700 тыһ. солк. угарга бэрэстэбиитэллээх уорган дьокутааттара быһаарыыны ылынан олороллор.