Кини эппитигэр олоҕурдахха, кулун тутар саҥата РФ ЫБМ Саха сиринээҕи кылаабынай управлениета уонна тыа хаһаайыстыбатын министиэристибэтэ кыттыылаах сүөһүнү, сылгыны эрдэттэн бэлэмнэммит уу ылбат үрдүк сиригэр илдьиигэ туһуламмыт үөрэх буолбут. Итинник сири Уус Амма нэһилиэгэр оҥорбуттар. Ону таһынан үп-харчы, күүс төһө бэлэмэ болҕомто үөһүгэр тутуллубут.

«Таатта улууһун түөрт нэһилиэнньэлээх пууна: Аммаҕа - Чымынаайы, Харбалаах, Даайа-Аммата, Тааттаҕа — Ытык-Күөл халаан уутугар былдьанар кутталлаахтар. Ити сабаҕалааһын туоллаҕына, 300 киһи, ол иһигэр 120 оҕо олорор 80 дьиэтэ, социальнай суолталаах тутуулар, суол-иис халаан иэдээнигэр түбэһиэхтэрин сөп», - диэтэ  Н.Унаров.

Харбалаахха баар эстэр веществолар ыскылааттара, муниципальнай, региональнай, федеральнай суолталаах суоллар, муосталар ууга былдьаныахтарын сөп.

Дьону быстах кэмэ олордор Чымынаайыга, Харбалаахха, Даайа-Амматыгар, Ытык-Күөлгэ 5 пуун тэриллибит. 5447 төбө сүөһүгэ уонна 3366 сылгыга үрдүк сир бэлэмнэммит. Кинилэргэ от, эбии аһылык аҕалыллыбыт.

Алдаҥҥа уонна Аммаҕа 8 га мууһу хараардыы үлэтэ түмүктэммит.

Боробул сэлиэнньэтигэр Таатта үрэххэ муус халыҥа бэрэбиэркэлэниэҕэ. Наада буоллаҕына, мууһу хараардыахтара.

Олохтоох дьаһалтаҕа эппиттэринэн, даамбалар уонна ууну мунньар сирдэргэ быһыы-майгы судургута суох.

Уопсайа 4 мөл. суумалаах резервнэй фонда тэриллибит.

Дьиэни-уоту, баайы-дуолу страховкалааһыҥҥа үлэ бара турар. Ууга былдьаныан сөптөөх сир учаастактарын генбылааннара чуолкайданар.