Билигин куорат аннынааҕы учаастакка 2 балаһаны хараарда сылдьаллар. Салгыы Лобуйаҕа икки сиринэн 2-лии балаһаны, Заборцевоҕа 2 балаһаны уонна Средниковскай учаастакка 2 балаһаны хараардыахтара. Бу үлэҕэ федеральнай бюджеттан 1 мөл. 494 тыһ. 300 солк. көрүллүбүт. Үлэ, күн-дьыл туругуттан көрөн, ыам ыйын 5 күнүгэр диэри ыытыллыаҕа.

Ааспыт сылларга курдук, халаан кэмигэр ким ханна үлэлиэхтээҕэ биллэр, тустаах дьон бэлэм сылдьаллар. Уу ылбыт сириттэн көһөрүллүбүт дьону быстах кэмҥэ “Кулума” Сынньалаҥ киинигэр уонна “Боотур” спортивнай комплекска олохтуохтара. Маныаха бэлэмнэнии үлэ эрдэттэн ыытыллыбыта. Туттар малынан-салынан, аһынан-үөлүнэн хааччыллыы боппуруостара быһаарыллыбыттар.

Быйыл Биир кэлим диспетчерскэй сулууспаҕа “КСЭОН” диэн саҥа аппаратура туруоруллунна. Онон нэһилиэнньэни сэрэтии үлэтэ ыытыллыаҕа. Куоракка 12 громкоговоритель баар. Маннык тэриллэр Арҕахтаахха, Берёзовкаҕа, Сыбаатайга, Налимскайга, Ойуһардаахха уонна Хатыҥнаахха туруоруллубуттара.

Арҕахтаахха, Берёзовкаҕа уонна куоракка баар гидропостары сэргэ быстах кэмҥэ Сыбаатайга эмиэ гидропост үлэлиэҕэ. Нэһилиэктэринэн сүөһүнү уу ылбат, үрдүк сиргэ көһөрүү былаана оҥоһуллан бэлэм. Халаан кэмигэр сөп буолар уматык саппааһа баар. Дамбаны бөҕөргөтүүгэ туттуллуохтаах кумах “Боотур” спортивнай комплекс таһыгар тиэллэн сытар.

Ууга барар тэрилтэлэр тиэхиникэлэрин көһөрөргө, малларын-салларын өрө тардынарга бэлэмнэнэ сылдьаллар, бары сэрэтиллибиттэрэ. Куорат дьаһалтата ууга барар кутталлаах оройуоннарга дьиэлэринэн сылдьан сэрэтии үлэтин ыытар. Сэрэтиллибиттэрин, эппиэтинэһи бэйэтигэр ылыналларын туоһулаан дьону анал сурунаалга илии баттаталлар.

Бу курдук бэлэмнэнии үлэ барар. Айылҕа хайдах дьаһайыаҕын бэйэтэ эрэ билэн эрдэҕэ. Онон барыга-бары бэлэм буолуохтаахпыт.

Хаартыскаҕа: Орто Халыма былырыын халаан кэмигэр.