Ол курдук, ааспыт сыл алтынньытын саҥатыгар бу ыал хотонноругар андаатар кэлэн киирбит уонна күн бүгүнүгэр диэри «квартирант» (Варвара Дмитриевна итинник диэн ааттыыр) буолан олорор.

Дьэ, бу дьикти көстүү туһунан сиһилии сырдаттахха маннык. Кыс хаар түспүтүн кэннэ, алтынньы саҥатыгар биир сарсыарда ыал ийэтэ Варвара Дмитриевна хотонугар тахсан баран дьиэтигэр төттөрү киирбит уонна кэргэнигэр хотон ааныгар туох эрэ суола баар диэн кэпсээбит. Тахсан көрөн баран, Виталий Алексеевич андаатар суола диэн быһаарбыт. Хотонноругар киирбиттэр, арай андаатардара бу утары көрөн олорор үһү. «Чэ, киирбит ыалдьыт сылдьар буоллаҕа. Сырыттын», - дэспиттэр.

Дьиктитэ диэн Ивановтар хотонноруттан чугас күөллэр биэрэстэттэн ордук хаамыылаах сиргэ бааллар. Уонна өссө андаатар хотон аанын өрө сүүрэн тахсан, өрбөхтөр быыстарынан иһирдьэ киирбит.

Маҥнай утаа сутурук эрэ саҕа андаатар аччык буолан дуу, хайдах дуу хотонноохтору батыһа сылдьар эбит. «Квартирант» икки сибиинньэни кытта тэҥҥэ асаһар эбит, онтон кэлин төрөлүйэн, өҥө-дьүһүнэ тупсан күнүһүн көстүбэт да буолла, дэһэллэр хотон хаһаайыннара. Билигин түүнүн эрэ тахсан аһыыр идэлэммит. Айылҕа кыыла чэнчиһэ сүрдээҕиттэн дьиэлээхтэр соһуйаллар эрэ.

Варвара Дмитриевна: «Дьукаахтаныахпытыттан ыла хотоммут биллэ сылыйда, «квартираммыт» бары муннуктары, кэлиргэ аннынааҕы быыстары хайда, бэл диэтэр, хотоммут урукку сылларга мууһунан килэйэр бэйэтэ билигин ханан да үргүйбэт буолла, ону тэҥэ «квартираммыт» муоста анныгар уйа оҥостор быһыылаах», - диир.

Ол курдук, хотоҥҥо 14 улахан сүөһү, 1 ньирэй, 2 сибиинньэ уонна 1 андаатар буолан кыстаан эрэллэр. «Саамай дьиктитэ диэн хотон кыыллара хара маҥнайгыттан бэйдиэ сылдьар андаатарга ончу кыһамматахтара, билигин да наадыйбаттар. Буолуохтааҕын курдук ылыннылар быһыылаах. Дьукаахпытын салгыы олорор буоллаҕына олордуохпут, ол гынан баран саас муус ууллуута күөлгэ киллэрэн ыытан көрүөхпүт», - диэн хаһаайка кэпсээнин түмүктээтэ.

Манна даҕатан эттэххэ, Варвара Дмитриевна уонна Виталий Алексеевич Ивановтары олунньу 14 күнүгэр – Тапталлаахтар күннэригэр ыал буолан олорбуттара 28 сыла томточчу туолбутунан редакция аатыттан истиҥник эҕэрдэлиибит.