Аска, тутаах суолталаах эмкэ сыананы таһынан бырайыак кыттыылаахтара олохтоох оҥорон таһаарааччылары өйүүр миэрэлэр олоххо киириилэрин бэрэбиэркэлиэхтэрэ. «Норуот хонтуруола» бырайыак  сыана политикатыгар хонтуруоллуур уорганнары кытта ыкса ситимнээхтик үлэлиэҕэ.

Бырайыагы сүрүннээччи Елена Голомарёва сэбиэт үлэтин туһунан иһитиннэриитигэр эппитинэн, улуустарга «Норуот хонтуруолун» хамыыһыйаларын саҥаттан тэрийиэхтэрэ.Сэбиэт бырайыак улуустааҕы салайааччыларын кытта селекторнай мунньаҕы ыытыаҕа.

«Аска, өҥөҕө уонна эмкэ сыананы хонтуруоллуур дьон тустаах дастабырыанньалары ылыахтара. Кыбаартал ахсын сэбиэт сыана хайдаҕын, олохтоох оҥорон таһаарааччыны өйөөһүн миэрэлэрэ төһө олоххо киирбиттэрин, арыгыны, пиибэни атыылааһыны хааччахтааһын сокуона төһө тутуһулларын ырытыаҕа», - диэтэ Елена Голомарёва.

«Уопсастыбаннай хонтуруолу тэрийээччилэр сыанана аһара үрдэппит атыы тэрилтэлэригэр рейдэлэри ыытыахтара. Бу туһунан иһитиннэрии биһиэхэ тута киириэҕэ. Онно олоҕуран ырытыы, анализ оҥоһуллар. Ким баҕалаах 8 (4112) 43-51-84 нүөмэрдээх телефоҥҥа эрийэн сыана үрдээһинин туһунан иһитиннэриэн сөп», - диэн кини эбэн эттэ.

2015 сылга өрөспүүбүлүкэ экономическай, социальнай сайдыытын былаанын Саха сирин баһылыга Егор Борисов олунньу 12 күнүгэр бигэргэппитэ.