Семинар кыттыылаахтарын улуус баһылыга А.Т.Ноговицын, улуус мунньаҕын председателэ Я.П.Оконешников эҕэрдэлээтилэр, бастыҥ общественник эр дьоҥҥо наҕараадалары туттардылар. Андрей Тимофеевич тыл этиитигэр кэлиҥҥи кэмҥэ эр дьон мунньахтарга кыттыылара улааппытын, уустук боппуруостарга этиппэккэ кэлэн күүс-көмөб уолалларын махтана, астына бэлиэтээтэ уонна общественнай хамсааһыннар үлэлэрин өйүүр сыаллаах улуус дьаһалтата анал граннары олохтуурун иһитиннэрдэ. УлууКыайыы 70 сылын көрсө, Олоҥхо ыһыаҕын тэрийии үлэлэрин чэрчитинэн ыытыллар бары дьаһалларга эр дьону көхтөөхтүк кытталларыгар ыҥырда.

Саха Республикатын гражданскай инициативаларга департаменын салайааччы Н.Д.Бугаев бу семинар-практикумҥа анаан кэлэн, общественнай хамсааһыннары государство өттүттэн ѳйөөһүн туһунан сырдатта. Салгыы мустубут эр дьоҥҥо ГАИ отделын начальнига В.Ефремов, лицензия уонна саа көҥүлүн инспектора Г.П. Андросов, ПДН инспектора Н. Попова, айылҕа харыстабылын инспекциятын начальнига М.П. Догордуров, булт хаһаайыстыбатын инспектора В.Г. Дорогунов, технадзор салайааччыта В.Н. Сивцев иһитиннэрии оҥордулар, ыйытыыларга хоруйдаатылар.

Мугудай нэһилиэгэр соторутааҕыта «Сарыал» диэн ыччат түмсүүтэ тэриллибитэ. Р.Ф. Катаков салайааччылаах ол түмсүү ыччаттара үлэлэрин билиһиннэрдилэр, атын нэһилиэктэргэ кинилэртэн холобур ыларга, чөл олоҕу тарҕатыы үлэтин тэрийэргэ ыҥырыы оҥордулар.

Семинар кыттыылаахтара түөлбэлэрбит, нэһилиэктэрбит, улууспут общественнай хамсааһыннарыгар, култуурунай уонна спортивнай дьаһалларыгар, чөл олоҕу тэрийиигэ сүрүн тирэх, эрэллээх эркин буолуоҕуҥ диэн биир санааҕа кэллилэр.