Сэбиэскэй норуот Улуу Кыайыытын умнуллубат ытык бэлиэтэ буолбут Кыайыы кыһыл былааҕын көрсүү үөрүүлээх тэрээһинэ улуус кыраныыссатыгар буолла. Ыраахтан, дьоһун сорудаҕы толорон, кэлбит мааны ыалдьыттары улуус ытык киһитэ, бастыҥ алгысчыт Филипп Соловьев аал уотун оттон, айах тутан, алҕаан-уруйдаан көрүстэ.

Кыайыы былааҕын көрсүһүү тэрээһинигэр "Нам улууһа" МТ баһылыга Александр Атласов, улуус ветераннарын сэбиэтин председателэ С.Д. Кобякова, РФ Сэбилэниилээх күүстэрин ветерана, старшай прапорщик В.Н. Новгородов, локальнай сэрии ветерана, "Хорсун быһыы" уордьан кавалера П.Н. Оконешников, СР байыаннай комиссариатын отделын начальнига О.А. Вознай сырыттылар.

Улуу Кыайыы 70 сылыгар туһуламмыт тэрээһин чэрчитинэн Кыайыы Знамятын Сахабыт сирин улуустарынан, нэһилиэктэринэн сырытыннарыы республикатааҕы эстафетата бу күннэргэ салҕанан бара турар. Намҥа Улуу Кыайыы Кыһыл Знамятын Хаҥалас улууһун баһылыгын эбээһинэһин толорооччу Василий Афанасьев салайааччылаах Покровскайдааҕы бизнес уонна технология колледжын студеннара арыаллаан аҕаллылар.

Олохтоохтор уонна ыалдьыттар көрсөн хардарыта эҕэрдэлэһиилэрин кэнниттэн, үөрүүлээх быһыыга-майгыга ыалдьыт Василий Владимирович улууспут баһылыгар Александр Павловичка Кыайыы Знамятын туттарда.

Бу күн Кыайыы Знамятын Нам улууһун делегацията Үөдэйинэн, 1 Хомустааҕынан, Партизанынан, Никольскайынан сырытыннаран Хамаҕаттаҕа тиэртэ. Саа-саадах тутан Ийэ дойдуларын хорсуннук-хоодуоттук көмүскээбит буойуннар албан ааттарын үйэтитэр сыаллаах тэрээһин иитинэн Улуу Кыайыы Знамята кулун тутар 3 күнүгэр диэри улуус бары нэһилиэктэрин кэрийиэҕэ.