Быйыл республикаҕа Предпринимательство сыла биллэриллэн, тыа сиригэр араас тэрээһиннэр тиһигин быспакка ыытыллаллар. Ол чэрчитинэн, Нам сэлиэнньэтигэр «Деревня мастеров» туристко–рекреационнай кластерга "Нам улууһа" МТ, улуус тыатын хаһаайыстыбатын управлениета уонна предпринимателлэрин өйүүр киин тэрийиилэринэн „Сайын кэллэ“ диэн атыы-тутуу дьаарбаҥката буолла. Онно оҕуруот аһын рассадалара, декоративнай мастар, норуот маастардарын оҥоһуктара, сиэмэ хортуоска, кумах, хара буор, о.д.а. атыыга турда.

Дьаарбаҥкаҕа анал балаһыанньа быһыытынан нэһилиэктэр икки ардыларыгар куонкурус биллэриллибитэ. Ол быһыытынан көхтөөхтөрүн, түмсүүлээхтэрин, оҕуруот аһын, үүнээйини кыайа-хото үүннэрэллэрин көрдөрөн Хатыҥ Арыы нэһилиэгэ (баһылык Ю.И. Слепцов) улуус дьаһалтата уонна улуус депутаттарын Сэбиэтэ туруорбут 100 тыһ. солк. сертификаттарынан наҕараадаланна. Нам сэлиэнньэтэ (баһылык А.Г. Новгородов) 60 тыһ. солк. уонна Хамаҕатта нэһилиэгэ (баһылык И.Н. Максимов) 30 тыһ. солк. сертификаттары туттулар.

Тэрээһин кэмигэр норуот маастардарын оҥоһуктара, нэһилиэктэр бастыҥ астара (блюдалара) аукциоҥҥа туруорулунна. Культура уонна духуобунас сайдыытын управлениетын иилээһининэн нэһилиэк ырыа куттаах дьоно ыллаан-туойан тэрээһин силигин ситэрэн биэрдилэр. Маны сэргэ спорка уонна физическэй култуураҕа управление үлэһиттэрэ „городкига“ уонна „дартска“ күрэстэри тэрийдилэр.

Предпринимательство сылынан, предпринимателлэри өйүүр улуустааҕы киин тэрийиитинэн үс предприниматель бизнес бырайыагын көмүскээтэ. Кинилэртэн Нам сэлиэнньэтин олохтооҕо тротуар билиитэтин оҥорор Дмитрий Николаев бырайыага биһирэннэ.

Маннык тэрээһиннэри нэһилиэнньэ биһириир. Ким эрэ олордубакка хаалбыт үүнээйитин булар-талар, ыһыы хортуоскатын булунар, тэлгэһэтин киэргэтэр сибэккилэри атыылаһар. «Сайын кэллэ» дьаарбаҥкаҕа сылдьыбыт хас биирдии киһи көрдүүрүн булан, наадалааҕын ылан, ситтэрбэтэҕи ситэн үөрэн-көтөн тарҕаста.