Ол курдук, оскуола иннинэ үөрэхтээһин тэрилтэлэрин салайааччылара уонна иитээччилэрэ, дириэктэрдэри үөрэх чааһыгар солбуйааччылар уонна учууталлар, дириэктэри иитэр үлэҕэ солбуйааччылар уонна оҕо тэрилтэтин баһаатайдара, дириэктэри научнай методическай үлэҕэ солбуйааччылар уонна учууталлар, алын сүһүөх кылаас учууталлара алта секциянан үлэлээтилэр.

Пленарнай чааска Литература сылын үөрүүлээхтик аһыы буолла. Манна Хатыҥ Арыы оскуолатын үөрэнээччилэрэ уонна Нам улууһун учууталлара хоһоон аахтылар. Тэрээһиҥҥэ „Нам улууһа“ МТ баһылыга Александр Атласов, баһылыгы социальнай боппуруостарга солбуйааччы Венера Дьяконова, үөрэх управлениетын начальнига Олег Протопопов, улуус сэбиэтин депутаттарын председателэ Иван Попов, „Кэскил“ республикатааҕы оҕо киинин методиһа, Нам улууһун куратора Ньургуйана Макарова, „Ленский край“ физико-математическай форум дириэктэрэ Владимир Егоров, Идэни үрдэтэр уонна үөрэҕи сайыннарар институт алын уонна инклюзивнай үөрэхтээһиҥҥэ кафедратын сэбиэдиссэйэ Людмила Прокопьева тыл эттилэр. Бу үөрүүлээх быһыыга-майгыга „Нам улууһа“ МТ баһылыга уонна „Ленский край“ физико-математическай форум дириэктэрэ улууспут үөрэнээччилэрин сайыннарар туһугар бииргэ үлэлэһэр сыаллаах сөбүлэһиигэ илии баттастылар.

«Нам улууһун үөрэҕин систиэмэтин соруктара уонна сайдар суоллара» диэн темаҕа уопут атастаһан учууталлар, педагогтар, оҕо саадын сэбиэдиссэйэдэрэ, төрөппүттэр бэйэлэрин үлэлэрин биир идэлээхтэригэр сырдаттылар уонна резолюция ылыннылар.

Ол кэнниттэн үөрүүлээх быһыыга-майгыга араас кэмҥэ үлэлээбит, үлэлии сылдьар учууталлар, иитээччилэр сыралаах, эҥкилэ суох үлэлэрэ сыаналанан, СР Үөрэҕин министерствотын, Намнааҕы үөрэх управлениетын, Нам улууһун дьаһалтатын түөскэ анньыллар бэлиэлэринэн, бочуотунай грамоталарынан, махтал суруктарынан бэлиэтэннилэр.