Манна Горнай, Ньурба, Сунтаар, Нам, Дьокуускай куорат спортивнай оскуолаларын салайааччылара сырыттылар. Бу күн спортивнай оскуолалар үлэлэрин-хамнастарын билистилэр. Хаҥаластааҕы «Хотой» Спортивнай кииҥҥэ Александр Куприянов дириэктэрдээх дзюдоҕа уонна тхэквондоҕа өрөспүүбүлүкэ анал оҕо спортивнай оскуолатын үлэтин кытта билистилэр, тренердэр отчуоттарын иһиттилэр, сыал-сорук туруорулуннулар.

2015 сылга ыытыллар спартакиадаҕа, оттон кэлэр сылга «Азия оҕолоро» оонньууларга дзюдоҕа уонна тхэквондоҕа спортсменнары бэлэмнээһиҥҥэ эппиэттээх оскуола дириэктэрэ Александр Куприянов: «Оскуолабыт тренердэригэр улахан эппиэтинэс сүктэрилиннэ. Онон, үлэбитин салгыы тупсарарга сыал-сорук туруорунабыт»,- диэтэ.

Саҥа спортивнай оскуола үлэһиттэрэ ыарахаттартан толлубаттар, өрөспүүбүлүкэ, Уһук Илиҥҥи региоҥҥа, Россия сүүмэрдэммит хамаандатыгар үрдүк таһымнаах спортсменнары иитэн таһаарарга бэлэмнэр.