Маннык туһалаах үлэ хайысхата тыа сирин олохтоохторугар өссө тиийимтиэ, чопчу көмөлөөх буоларын ситиһээри улуустарынан, нэһилиэктэринэн командировкаҕа туһааннаах министиэристибэлэртэн, биэдэмэстибэлэртэн, тэрилтэлэртэн специалистары кытыннарыы үгэскэ кубулуйан эрэрэ кэрэхсэбиллээх. Киин быйылгыттан иһитиннэрэр-биллэрэр үлэтин өссө киэҥ хабааннаахтык ыытар инниттэн бэчээти, тэлэбииһэринэн уонна араадьыйанан биэриилэри, Интернет ситимин күүскэ туһанан, нэһилиэнньэни кытта ыкса үлэлииргэ сорук туруорунна.

Автономнай тэрилтэ генеральнай дириэктэрэ Афанасий Софронеев иһитинннэрбитинэн, Киин ааспыт сылга судаарыстыба тиэрдибит сорудаҕын барытын толордо. Киин специалистара сыл устата тыа хаһаайыстыбатын табаарын оҥорооччуларга 277 бизнес-былаан оҥоһулларыгар көмөлөспүттэр: ол иһигэр “Саҥа саҕалыыр фермери өйөөһүн” тус сыаллаах федеральнай бырагыраама граныгар киирсэргэ 166 сайаапка киирбититтэн 155-гэр, оттон “Бааһынай хаһаайыстыба базатыгар дьиэ кэргэн ферматын сайыннарыы” бырагыраама граныгар 40 фермергэ бизнес-былаан оҥорон биэрбиттэр. Маннык грант үбүн көмөлөһүннэрэн 2013 с. улуустарга 5 хотон, оттон 2014 с. 7 хотон тутулунна. Ону таһынан ааспыт сылга Чурапчы Мугудайыгар «Чараҥ» агрокластер үлэҕэ киирдэ. Манна 25-тии ынах турарыгар түөрт уонна 50 ынах сүөһү кыстыырыгар биир хотон тутулуннулар. Бааһынайдар бизнес-былаан көмүскээннэр, барыта 266 мөл. 903 тыһ. солк. суумалаах кредит ылбыттар.

Кэлиҥҥи кэмҥэ тыа сиригэр, кытыы нэһилиэктэргэ тиийэ, грант үбүгэр тиксиэн баҕалаах киһи элбээтэ. Ол иһин Киин специалистара кыһыҥҥы суолу баттаһа командировкаларга элбэхтик сылдьан, бааһынай хаһаайыстыбаны саҥардыы тэринэн үлэлээн эрэр уонна саҥа хотон туттуон, база оҥостуон баҕалаах фермердэргэ сүбэ-ама биэрэллэр, бизнес-былаан оҥостоллоругар көмөлөһөллөр. Нэһилиэк таһымыгар агрокластер тэринэргэ туруммуттар даҕаны аҕыйаҕа суохтар.

Киин специалистара саҥа сылга үктэнээт, илин эҥэрдээҕи улуустары бүтүннүү уонна Нам, Хаҥалас, Уус-Маайа, Кэбээйи, Бүлүү улуустарын кэрийдилэр. Быйылгы куонкурус балаһыанньата кулун тутар ортотун диэки бигэргэниэ. Билигин куонкуруска киирсиэн баҕалаах эдэр фермердэр Тыа хаһаайыстыбатын академиятын иһинэн АПК үлэһиттэрин идэлэрин үрдэтэр институкка кууруска үөрэнэ сылдьаллар.