Тэрээһиҥҥэ олохторун оҕону иитиигэ-көрүүгэ анаабыт үтүө-мааны иитээччилэр, сэбиэдиссэйдэр, үлэһиттэр, оҕо иитиитин туһугар өр кэм дьаныардаахтык, үтүө суобастаахтык үлэлээн-хамсаан, бастыҥ холобуру көрдөрөн өрүү инники күөҥҥэ сылдьыбыт, дьон-сэргэ дириҥ ытыктабылын ылбыт бэтэрээннэр уонна ыҥырыылаах ыалдьыттар кыттыыны ыллылар.

Оскуола иннинээҕи үөрэхтээһин сылынан «Нам улууһа» МТ баһылыга Александр Атласов, үөрэх управлениетын начальнига Олег Протопопов, дьиэ кэргэн уонна ыччат политикатын отделын сүрүннүүр специалиһа Татьяна Степанова, РФ үөрэҕириитин туйгуна, СР үөрэҕириитин үтөлээх үлэһитэ Людмила Черноградская мустубут дьону эҕэрдэлээтилэр, баҕа санааларын эттилэр. Быйыл бу сылынан оҕо уһуйааннарыгар 50, 100, 150 тыһ. солк. граннар олохтоммуттарын иһитиннэрдилэр.

«Сардаҥа» кинотеатр көрүдүөрүгэр нэһилиэктэр оҕо саадтарын иитээччилэрин үлэлэригэр туттар араас бэйэ оҥоһуктара, көрдөрөн үөрэтэр матырыйааллара, оонньурдар көрдөрүүгэ туруоруллан дьон болҕомтотун тарта. «СР оскуола иннинээҕи үөрэхтээһин тэриллиитин историята» диэн видеосюжеты көрдөрдүлэр.

Нэһилиэктэртэн оҕо саадын иитиллээччилэрэ - регионнааҕы, республикатааҕы, улуустааҕы таһымнаах араас куонкурустар кыайыылаахтара, үҥкүү, ырыа ансаамбыллара, фольклор бөлөхтөрө уонна Хамаҕатта нэһилиэгин «Сарыал» оҕо саадын коллектива тэрээһини киэргэттилэр.