«

Геннадий Бечеряков кинигэтин, арааһа, түбэһиэхчэ «Чуумпуга» диэн ааттаабатах быһыылаах. Кырдьык, кини дарбааннаах тыллары сөбүлээбэт, чуумпуга тардыһар «чуумпу» поэт эбит. Ол эрээри, быһыыта, кини чуумпуга, айылҕа ортотугар бүөбэйдэнэр хоһоонноро, ордук общественнай ис хоһоонноохторо, ол чуумпуттан киэҥ эйгэҕэ дуораһыйан тахсар тосхоллоро ис тутулугар кистэммэттэр...», – диэн поэт, «Чолбон» сурунаал сүрүн редактора Урсун кинигэ киирии тылыгар «Чуумпу дибилгэнэ» диэн төбөлөөн суруйбут.

Геннадий Бечеряков кинигэтин «Айылҕам алыба», «Ону-маны... олоҕу», «Таарыйа тапталы...», «Олбу-солбу... ону-маны», «Төрөөбүт түөлбэ», «Күһүҥҥү лыахтар» диэн киһи «сык» гына түһэр түһүмэхтэргэ араарбыт.

Биллэрин курдук, ааптар матыып айбыт хоһоонноро өссө устудьуоннуу сылдьыаҕыттан ырыа буолан көппүттэрэ, туспа дискэнэн тахсыбыттара. Ол да иһин, кинигэҕэ 27 ырыа «Күһүҥҥү лыахтар» түһүмэххэ саас-сааһынан киллэриллибит. «Доҕорбор», «Умуллубут сулус», «Дьол уонна сор», «Хотой» уо.д.а кини талааныгар сүгүрүйээччилэр сэҥээрбит, бөлүһүөктүү көрүүлээх ырыалара киһи ис кутун таарыйаллар, элбэхтик ылланаллар.

Саҥа кинигэ кыра форматтаах, онон ырыанньык курдук илдьэ сылдьарга табыгастааҕын бэлиэтиир тоҕоостоох.

Кинигэни «Книжный маркет» маҕаһыыннар ситимнэриттэн атыылаһыахха сөп.