Үс сыллааҕыта үлэҕэ киирбит ынах сүөһү турар комплексыгар ферма биригэдьиирин Ульяна Семенованы көрүстүм.

- Хотоннорбут сэбиэскэй кэмнээҕи тутуулар, букатын эргэрдилэр. Иэдээн тахсыан иннинэ, 200 ыччат сүөһүлээх этибит, онтон билигин 138 хаалла. Саҥа хотон туттарбытыгар «Анаабыр алмаастара» ААУо 2 мөл. солкуобайынан көмөлөстө. Дириэктэрбит А.В.Павлов Дьокуускайтан сири үүттүүр массыына кэпсэтэн, сыбаайатын олордон, эрдэ булуммут сэндвич-панелларынан бу 40 миэтэрэ усталаах, 13 м. туоралаах саҥа хотон тутуутун саҕалаатыбыт. Саҥа хотоҥҥо ыччат сүөһүбүт аҥара эрэ батар. Онон кэлэр сайын тутуу матырыйаала булунан, бу аттыгар маннык кээмэйдээх эбии хотон тутуохтаахпыт ортотунан холбоһугар сынньанар хос, уу емкоһа турар сирэ баар буолуоҕа. Бэйэбит олохтоох уолаттарбыт сэттиэ буолан биригэдьиир Пахомов Степан Иванович салалтатынан үлэлии сылдьаллар.

Умайбыт хотоммутун хат сөргүппүппүт, онно билигин саҥа төрөөбүт ньирэйдэр тураллар, - диэн Ульяна Степановна санаатын үллэһиннэ.

«Бөртө» сылгы собуотун генеральнай дириэктэрэ Александр Павлов манна бу курдук эбэн эттэ:

- Бастатан туран, иэдээн иэнигэйбитигэр биһиэхэ илиитин утары ууммут киһибитигэр - учредителбитигэр, «Анаабыр алмаастара» ААУо генеральнай дириэктэригэр М.Н.Евсеевкэ улахан махталлаахпыт. Кини тута бирикээс таһааран икки мөлүйүөн солкуобай биэрбитэ. Ол үбүнэн уонна бэйэбитигэр баар сэндвич-панель дэнэр матырыйаалынан 100 төбөҕө анаммыт хотоммут тутуутун саҕалаабыппыт. Бу ый бүтүүтэ көҥдөйүн бүтэриэхтээхтэр, - диэтэ дириэктэр Александр Васильевич.

Саҥа хотон атахха турар, акылаата, өһүөлэрэ модьу-таҕа тиит маһынан оҥоһуллубут. Онон улахан-ааннар кэлэр кыстыкка хотоннорун үлэҕэ киллэрэн үрүҥ илгэни үрүлүтүөхтэрэ, эмис эти дэлэтиэхтэрэ.