Семинарга Дьокуускай куорат Думатыттан регионнааҕы салаа кэмитиэтин салайааччы Туйаара Илларионова, Дьокуускай куорат Думатын аппаратын салайааччы Анатолий Васильев, куорат эдэр ыччатын палататын бэрэссэдээтэлэ Владимир Булкин, Өлөөн оройуонун бэрэстэбиитэллээх уорганын чилиэннэрэ, нэһилиэктэр бэрэстэбиитэллэрэ, дьокутааттара кыттыыны ыллылар. Маны сэргэ ыаллыы сытар Анаабыр эбэҥки-долган национальнай улууһун Сэбиэтин бэрэссэдээтэлэ Галина Алексеева салайааччылаах түөрт киһилээх делегация кэлбит.

Өлөөннөөҕү олохтоох бэйэни салайыныы салаатын салайааччы Зоя Григорьева бэйэтин этиититигэр бүгүҥҥү тэрээһин суолтатын бэлиэтээтэ. Салгыы оройуон баһылыга Александр Иванов оройуоҥҥа промышленность өтөн киирэн эрэринэн, аҕыйах ахсааннаах төрүт олохтоохтор сокуон өттүнэн көмүскэллээх буолууларыгар, аар айылҕабытын харыстааһыҥҥа депутаттар бастакы далаһа буолаҕыт, билигин ордук хоту улуустарга ааннаан турар хара дьайы - арыгылааһыны утары дьаныһан туран үлэлиэхтээхпитин, ыччат бары араҥатын хабан дьайымтыалаах соруктары туруорарбыт ирдэнэрин эттэ, Ил Түмэн депутаттарын оройуон социальнай-экономическай сайдыытыгар бииргэ үлэлииргэ ыҥырда.

Бу кэнниттэн Бүтүн Россиятааҕы олохтоох бэйэни салайыныы Сэбиэтин регионнааҕы салаатын чилиэнэ Туйаара Илларионова Сэбиэт ыытар үлэтин туһунан сырдатта. Анаабыр улууһуттан Галина Алексеева оройуоннааҕы Сэбиэт үлэтин уопутун үллэһиннэ. Киин куорат Думатын аппаратын салайааччы Анатолий Васильев олохтоох салайыныы бэрэстэбиитэллээх уорганын тэрээһин үлэлэрин сырдатта «Тенденции развития муниципального земельного и имущественного комплекса в условиях изменений федерального законодательства: новые требования и порядки» диэн тиэмэҕэ тыл эттэ. Анаабыртан «Сааскылаах (эбэҥки) национальнай нэһилиэк» МТ баһылыга Евгений Лаптев хоту улуустар баһылыктарыгар, депутаттарыгар бу тиэмэҕэ анаан-минээн семинар ыыталларын туруоруста. Салгыы Владимир Булкин олохтоох салайыныыга ыччат кыттыытын кэпсээбитин сэргии иһиттилэр.

Елена Голомарева, СР народнай депутата:

- Биһиги 2003 сылтан бэйэни салайыныы боппуруостарынан ылсан дьарыктанабыт. Кэккэ сылларга ыаллыы Анаабыр улууһун олохтоохторун кытта Томтор Таас сэдэх тимир баайдаах сирин туһаҕа таһаарыынан тулалыыр эйгэбит туругар үгүстэ алтыһыахпыт турдаҕа. 2003 сыллаахха оройуоннааҕы Сугулаан олохтоох сирбитин-уоппутун аҕыйах ахсааннаах норуоттар төрүт дьарыктарынан дьарыктанар, бултуур-алтыыр территорияларын быһыытынан киллэрбиппит. Билигин табаһыт дьиэ кэргэн көмүскэллээх буолуутун хааччыйар, аныгы үлэ усулуобуйатын олохтуур, кинилэргэ социальнай өттүнэн көмөлөһөр сыаллаах көс олохтоох дьиэ кэргэн туһунан сокуону ылынаары үлэлии сылдьабыт.

Галина Алексеева, Анаабыр улууһун депутаттарын оройуоннааҕы Сэбиэттэрин бэрэссэдээтэлэ:

- Көрсүһүүгэ муниципальнай тэриллиилэр үлэлэрин уопутун билистибит уонна ыаллыы сытар буоламмыт тыа хаһаайыстыбатыгар, промышленноска бииргэ үлэлиэхтээхпит көстөн турар. Биһиги күн бэҕэһээ улууспутугар аҕыйах ахсааннаах төрүт олохтоохторго төрүт дьарыктанарынан дьарыктанар, олорор сирдэригэр сири-уоту, булду-алды туһаныыны көҥүллүүр балаһыанньаны ылынныбыт. Эһиэхэ нэһилиэнньэни көмүскүүр бу балаһыанньа үлэлээбитэ хаһыс да сыла, онон промышленниктар Томтор Тааска хостонор баайгытын туһаҕа таһаарыыларыгар балары учуоттуохтара.

Өлөөн сиригэр бастакынан көһө сылдьар семинары ыыппыт Туйаара Илларионова семинар түмүгүттэн астынарын биллэрдэ: «Бүгүн икки оройуон депутаттарын Сэбиэтин көрсүһүүтэ санаа атастаһыытын быһыытынан барда. Икки өттүттэн кэпсэтиигэ көхтөөхтүк кытыннылар, элбэх ыйытыктары биэрдилэр, Сир кодексатыгар киирбит уларыйыылар, ыччат хамсааһыннарын тэрийиигэ экспердэр санааларын иһиттилэр. Дьокуускай куоракка буолуохтаах аныгыскы семинарга бу тиэмэни салгыахпыт. Бу муус устар 4-5 күнүгэр биһиги регионнааҕы салаабыт бэрэстэбиитэллээх уорганнар ассоциацияларын кытта кыттыһан республикатааҕы спартакиаданы ыытарга бэлэмнэнэбит. Ил Түмэн депутаттарын кытта олохтоох салайыныыга ситимнээх аһаҕас истиилэргэ, «төгүрүк остуолларга» өрүүтүн да кыттыахпыт».

Өлөөн оройуона төрүттэммитэ 80 сылын чэрчитинэн ыытыллыбыт бастакы көһө сылдьар семинар кыттыылаахтара инникитин даҕаны дьоннорун-сэргэлэрин олохторун таһыма тупсарыгар кыһамньыларын ууран үлэлиэхтэрэ-хамныахтара диэн улахан эрэл баар.