"Куонкуруска 14-тэн 55-гэр диэри саастаах 104 киһи кытынна. “Журавли”, “Синий платочек”, “Смуглянка” ырыаларынан доҕуһуолламмыт үҥкүүлэри, пляскалары көрөөччүлэр дохсун ытыс тыаһынан арыаллаатылар.

Бу дьоро киэһэттэн кыттааччылар, көрөөччүлэр бары улаханнык долгуйдулар. Аҕам саастаахтар сэрии сылларынааҕы оҕо саастарын, сэрии толоонугар охтубут, уоттаах сэриигэ кыттыбыт аҕаларын, убайдарын, таайдарын долгуйа, ахта санаабыттарын этэллэр.

Билигин нэһилиэктэринэн пьесалары көрүү куонкуруһугар бэлэмнэнэ сылдьаллар - диир улуус дьаһалтатын специалиһа Айталина Санникова.

Куонкурус сүрүн бирииһин “Уолан” Духуобунас киинин үҥкүүһүттэрин бөлөҕө (салайааччы Вера Федорова) ылла. Бастакы миэстэҕэ Ньургуйаана Васильева салайааччылаах “Таман” эдэр ыччат түмсүүтэ таҕыста. Иккис бочуоттаах миэстэни Олимпиада Текеянова салайааччылаах Одуну нэһилиэгин үҥкүүһүттэрэ, үһүс бириистээх миэстэни “Сиккиэр” коллектив (салайааччы Александра Егорова, Солоҕон) ылбыттар.