Сыаҥааннаах сорсуннаах булчуттара үс ардай аһыылааҕы сууһардылар

Абый улууһун Сыаҥааннааҕар бу күһүҥҥүттэн, сэтинньи ый саҥатыттан, бөрөлөр улахан хоромньуну оҥордулар - 30 сылгыны тартылар. Бааһырбыттар да бааллар. Сорох сылгылар хаһаайыттара билигин да биллэ иликтэр.


Адьырҕалары бултааһыҥҥа нэһилиэк дьаһалтата анал биригээдэ тэрийбитэ. Билиҥҥитэ Василий Иванович Старостин уонна Иван Николаевич Садовников үс бөрөнү бултаатылар: 2 тыһыны, 1 атыыры. Биири - трос туһаҕынан, иккини — хапкаанынан, биир туһахтан куоппут. Икки мытаары (ньаҕаччы) буолан барбыттар. Сур бөрөлөрү Уолбут Күөлүттэн уонна Буур Хаайбыттан, Никулина Елена Николаевна оттуур сириттэн бултаабыттар.
Биир бөрө иһин улуус дьаһалтата 10 тыһ. солк. төлүүр, "Сахабулт" - 20 тыһ, нэһилиэк дьаһалтата - 1 буочука бензини көрөр. Оттон хоромньута оннооҕор сүрдээх.
"Билигин да үс бөрө суола баар. Мантан антах хаар ирэр буолан, хапкаан тоҥон хаалар, онон үктээбэт. Аны көмнөххө туһах көстөн турар. Кыйдаһан эрэ бултуохха сөп. Онуоха уматык наада", - диир Иван Николаевич.
Иван Николаевич Садовников — сорсуннаах кадровай булчут. Кини 1989 сыллаахтан бултуур. Быйыл 40 кииһи, 2 кырсаны, 40 кырынааһы туттарда.