Күрэхтэһиини үөрүүлээхтик аһыыга улуус баһылыгын бастакы солбуйааччы А.А. Ноговицын, Булт хаһаайыстыбатын департаменын бэрэстэбиитэлэ В.А. Павлов, Арыылаах нэһилиэгин баһылыга Н.Е. Сыромятников, күрэхтэһии кылаабынай судьуйата В.С. Дьяконов эҕэрдэ тыл эттилэр.

Сарсыарда ыраас күнүнэн чэмэлийэ турбут халлаан биир кэмҥэ, булчуттары тургутан бадахтаах, өрө силлиэрэ түстэ. Ол эрээри, булчуттар онтон уолуйбатылар, күрэстэһии өссө сытыырхайан биэрдэ.

Барыта түөрт көрүҥҥэ илин-кэлин түһүстүлэр. Бастаан автомат сааны ыһан баран хомуйуу уонна маһы бэлэмнээн уот оттон чэй оргутуута тэҥҥэ ыытылынна. Сааны хомуйууга МЧС хамаандатыттан Егор Анемподистов олус үчүгэй көрдөрүүлэннэ. Сып-сап өһүлэ, хомуйа охсон 37 сөкүүндэнэн бэлэм оҥордо. Иккиһи Төлөйтөн 55 сөкүүндэ көрдөрүүлээх Николай Дьячковскай, үсүһү Мугудай хамааандатыттан 1 мүнүүтэ көрдөрүүлээх Валерий Сивцев ыллылар.

Чэй оргутуутугар уолаттар оллоонноругар уматыахтаах мастарын араас ньыманан сааһылаатылар: ураһа курдук, аралыайкалыы, о. д. а. Мастарын сороҕун бытархай, сороҕун арыый бөдөҥ гына хайыталаатылар, кыспа кыстылар. Бары тэҥҥэ кэриэтэ уматтылар, сытан эрэ үрэн күөдьүтээччи элбээтэ. Сорох саппыкытын устан күөртээтэ. Араас туттуу-хаптыы, дьэ, манна буолла. Киин балыыһа чэйэ кимнээҕэр да эрдэ оргуйан „Ураа“ хаһыы дуораһыйда. Хадаардар иккис, төлөйдөр үһүс буоллулар.

Ойбон алларыытыгар хамаандаттан үстүү киһи кытынна. Икки киһи алларар, биир киһи баһар. Манна сорохтор солбуйса сылдьан, сорохтор иккиэн тэҥҥэ үлэлээтилэр. Анньыылар да оҥоһуулара араас. Старт бэриллээтин кытта анньыы тыаһа чып-чыбырҕас буолла, көйүллүбүт мууһу баһааччылар өрө ытылла түстүлэр. Хайахсыттар, интэринээт-оскуола хамаандалара тэҥҥэ кэриэтэ ууну таһаардылар. Аны шаблон (50 см диаметрдаах) көҥүл киирэр гына көйүллүөхтээх. Хайахсыттар урутаатылар - бириэмэлэрэ 1 мүн. 36 сөк. Иккис буолбут интэринээт-оскуола хамаандатын бириэмэтэ - 1 мүн. 55 сөк. Арыылаах хамаандата 2 мүн. көрдөрүүлээх үһүс буолла.

Күрэхтэһиини аҕыстүһүмэхтээх эстафета түмүктээтэ. Бастакы түһүмэх—тоҥуу хаарынан сүүрүү, иккис—батарантааһы баанан, рюкзагы кэтэн, сааны сүгэн баран сүүрүү, үһүс—бэрэбинэ үрдүнэн (1 м үрдүккэ турар) сүүрүү, төрдүс—хайыһарынан сүүрүү, бэһис - үрдүк истиэнэни нөҥүө түһүү, алтыс - үс хаар булгунньаҕы уҥуордааһын, сэттис - уһун перекладинанан үрэҕи туорааһын. Манна МЧС хамаандата бастаата, иккис—Хайахсыт, үһүс – Арыылаах.

Уопсай түмүккэ Хайахсыт хамаандата бастаата, МЧС - иккис, Төлөй үһүс буоллулар.

Дьон-сэргэ интэриэһин эстафета аҕыстүһүмэҕин барытын биир киһи сүүрэн кэлэр коммерческай күрэҕэ тарта. Барыта 8 эр бэрдэ кыттыыны ылла. Сымса, быһый, күүстээх, тулуурдаах буолууну эрэйэр олус уустук түһүмэхтэрдээх күрэхтэһиигэ МЧС хамаандатыттан киирбит Георгий Неустроев бастаан кэллэ. Киниэхэ улуус чиэһин элбэх көрүҥҥэ көмүскээбит, мас тардыһыытыгар спорт мааастара, сорсуннаах булчут Григорий Кэнчэриевич Барашков олохтообут 5 тыһ. солк. туттарылынна.

Ойбон алларыытыгар абсолютнай кыайыылааҕы быһаарар күрэхтэһиигэ 10 спортсмен кыттыыны ылла. Бирииһэ -„Сахабулт“ Чурапчытааҕы филиала олохтообут туртаска лицензия буолла. Бэрт эрийсиилээх киирсии түмүгэр Арыылаахтан Марк Демьянов кыайыылааҕынан таҕыста.

Күрэхтэһии түмүгүнэн бастыҥнар сүүмэрдэнэн, муус устар 3-4 күннэригэр республикатааҕы күрэскэ кыттыахтара. Таарыччы аҕыннахха, былырыын Чурапчы хамаандата республикаҕа бастаан турар. Билигин сүрүн састаап торумнанна. Уолаттарбытыгар кыайыыны баҕарыаҕыҥ!