Бэл үс саастаах Каролина Иванова кыттан хоһоон аахта. Фольклор көрүҕэр Нина Потапова салайааччылаах «Аман өс» народнай фольклорнай ансамбль Былатыан Ойуунускай «Мин ырыам ылланыа, мин аатым ааттаныа» диэн туруоруутунан куонкурус Гран-притин хаһаайынынан буолла.

Сунтаардааҕы оҕо искусство оскуолатын «Айтыын» вокальнай бөлөх (салайааччы Юлия Филиппова) академическай вокалга, Розалия Никифорова салайар Кутанатааҕы «Күн сардаҥата» ансамбла үҥкүүгэ куонкурус сүрүн бирииһин ыллылар.

Эмиэ үҥкүүгэ лауреаттар лауреаттара ааты Бүлүүчээнтэн «Анал» (Лидия Подрясова) ансамбль ылла. Бастыҥ үҥкүү коллективынан бу да сырыыга улуус киэн туттар «Түһүлгэ» ансамбла (Василина Слепцова) буолла.

Биирдиилээн ырыаһыттар сыаналаннылар. Кинилэр ортолоругар Хороттон Василий Федоров эмиэ ааттанна.

Хомуска Сунтаардааҕы оҕо искусство оскуолатын үөрэнээччилэрэ Саина Игнатьева, Андрей Федоров бастыҥнарынан буоллулар.

Куонкурус кылаабынай судьуйата, Дьокуускайтан сылдьар Ньургуйаана Куличкинаны кытта кэпсэттим. Кини Сунтаар улууһун оҕолоро куруук республикаҕа инники күөҥҥэ сылдьалларын астына бэлиэтээтэ. Ньургуйаана Анатольевна бу да сырыыга Сунтаартан хас да оҕо аны сайын от ыйыгар Дьокуускай куоракка буолар куонкурус түмүктүүр түһүмэҕэр кыттыаҕын эттэ. Онон оҕолорбутугар ситиһиилэри баҕарыаҕыҥ.