Быйылгы сааскы ыҥырыыга 18-27 диэри саастаах 150 тыһыынчаттан тахса ыччат сүүмэрдэниэхтээх. Бу былырыыҥҥытааҕар түөрт тыһыынчанан аҕыйах. Былырыын баччаларга Сэбилэниилээх Күүстэргэ 154 тыһыынча курдук эдэр киһи ыҥырыллыбыта.

Армияҕа ыҥырыллааччыларга элбэх саҥа көрүҥ киллэрилиннэ. Холобур, хас биирдии саллаакка тус электроннай карта бэриллэр. Онно саллаат туһунан 300-тэн тахса параметр, ол иһигэр биометрическай чахчылара, суруллар. Ону сэргэ уолаттарга баан кредиткэтэ бэриллэр. Кредиткэҕэ сулууспалыыр кэмигэр ый аайы 2 тыһыынча курдук харчы түһэр.

Үрдүк үөрэҕи бүтэрбит дипломнаах ыччаттар бэйэлэрин баҕаларынан армияҕа бара сатыыллара элбээтэ. Кинилэр биир сылга эбэтэр икки сылга хантараагынан сулууспалыылларын бэйэлэрэ талар бырааптаахтар. Маннык практиканы инникитин өссө сайыннарарга былаанныыллар.

Кэнники сыллартан бэттэх сорох куораттарга студент үөрэнэ сылдьан «сулууспалыыр», ол эбэтэр байыаннай кафедраҕа үөрэнэр. Ол эрээри, байыаннай эбээһинэһи институттарга, университеттарга үөрэнэ сылдьан толоруу ньымата олоххо маассабайдык киирэ илик. Онон үөрэҕи бүтэрэн баран, син биир сулууспалыы баралларыгар тиийэллэр.

Үөрэҕи үчүгэйдик бүтэрии инники үлэҕэр эрэ туһалаах буолбат эбит. Үрдүк үөрэҕи үчүгэйдик бүтэрбиттэргэ научнай роталарга суруйтарарга кыах бэриллиэн сөп. Ол гынан баран, улахан куонкуруһу уонна кытаанах сүүмэрдээһини ааһыахтааххын. Оттон модьу-таҕа уолаттары спортивнай роталарга ылыахтарын сөп.