«Чолбон» сурунаал муус устардааҕы нүөмэрэ бэчээттэн таҕыста

Бу күннэргэ сүрэхтэн кутуллар нарын-намчы тыллардаах хоһооннордоох, дууһаны долгутар кэпсээннэрдээх, эссе-сэһэннээх «Чолбон» сурунаал 4 №-рэ күн сирин көрдө.


Муус устардааҕы нүөмэргэ прозаны таптааччылар классик- суруйааччыбыт Анемподист Софронов-Алампа «Куораччыт» диэн аатырбыт кэпсээнин ааҕан, Уһун Ыстапаан дьадаҥы олоҕун, тыйыс дьылҕатын кытта уонна муус устар 13 күнүгэр 70 сааһын туолбут «Чолбон» сурунаал кылаабынай редактора Николай Винокуров-Урсун «Айбыт аҕа», «Мэһэйдээһин» , «Комсомольскай билиэт» кэпсээннэрин кытта билсиэхтэрэ.
Ааптарбыт Валерий Попов «Алта уон тоҕус ньургуһун» эссе сэһэнигэр Улуу Кыайыы өрөгөйдөөх бырааһынньыгар анаан кыайыгар-хотугас саха эдэр уолаттара геройдуу сэриилэспиттэрин итэҕэтиилээхтик арыйан сэһэргиир.
Поэзияны сөбүлээччилэр Бойуот уонна Алаас Хотуна иһирэх иэйиилээх хоһооннорун астына-дуоһуйа ааҕыахтара.
Литература сылын чэрчитинэн, филологическай наука доктора З.К. Башарина «Үтүө аат өлбөөдүйбэт» (И.Г. Спиридонов 85 сылынан) уонна Бииктэр Таппыыйап «Уон сыл чаҕылхай түмүгэ», Николай Рыкунов «Тыыннаах айымньы» (Уус-уран айымньы туһунан) ыстатыйалара бэчээттэннилэр.
«Фронтовик суруйааччыларбыт 100 сыллара» рубрикаҕа филологическай наука кандидата Саргылаана Ноева «В.С. Соловьев-Болот Боотур романнарыгар Сир уобарас быһыытынан» уонна Е.Г. Винокуров «Макар Хара – Улуу Кыайыы ырыаһыта» ыстатыйаларын кытта билсиэххит.
Ааҕааччы «Очерка уонна публицистика», «Биһиги юбилярбыт», «Көмүлүөк сылааһа» рубрикаларынан тахсыбыт матырыйааллартан Урсун айар олоҕун үөлээннээхтэрин ахтыыларын, Айысхаана Болот Боотур кыргыттарын кытта сэһэргэһиититтэн кинилэр олохторун араас түгэннэрин кытта сиһилии билсиһиэххит.