- «Чолбон» сурунаал кылаабынай редактора Николай Винокуров-Урсун үөрэнээччилэргэ Саха сирин Суруйааччыларын союһа тэриллибитэ 80 сылыгар анаан оскуола оҕолорун, устудьуоннар ортолоругар ыытыллыбыт литературнай куонкурус түмүгүн билиһиннэрдэ. Уонна онно кыттан иккис миэстэни ылбыт бу оскуола сэттис кылааһын үөрэнээччитигэр Дуолан Лугиновка диплому уонна сыаналаах бирииһи туттарда. Куонкуруска көхтөөхтүк кыттыбыт Айыына Зыкова, Андрей Иннокентьев, Марк Данилов Махтал суругунан бэлиэтэннилэр. Оҕолору бу куонкуруска бэлэмнээбит учуутал Клара Ксенофонтоваҕа Махтал сурук уонна кинигэ бэлэх туттарылынна.
- Көрсүһүүгэ саха народнай суруйааччыта Семен Попов-Тумат, Анна Варламова-Айысхаана, Иван Осипов-Ойуур, Данил Макеев үөрэнээччилэргэ айар үлэлэрин туһунан кэпсээтилэр, саха тылын өрө тутар сайдыылаах дьон буола улааталларыгар баҕардылар, кинигэлэрин бэлэхтээтилэр.
- Математика учуутала Александр Чиряев, төрөппүт, педиатр-быраас Саргылаана Иннокентьева суруйааччылары кытта маннык көрсүһүүлэр олус туһалаахтарын ыйан туран, саха тылын суолтатын билиһиннэрэр үлэ күүскэ ыытыллыан наада диэн санааларын үллэһиннилэр.
- Саха тылын, литературатын учуутала Клара Ксенофонтова «Чолбон» сурунаал үлэһиттэрэ кэлэн ыалдьыттаабыттарыттан үөрэрин эттэ, үтүө сүбэлэрин иһин махтанна.
- Салгыы оҕолор олоҥхолоон, хомуска оонньоон дьоҕурдарын көрдөрдүлэр, народнай поэттар хоһооннорун ааҕан ыалдьыттарын сэҥээртилэр.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети