Витим бөһүөлэгэр уу таһыма 428 см, оттон тыҥааһыннаах, олус кутталлаах таһым 957 см. быһыллар. Хойуу муус устар. Пеледуй таһыгар уу таһыма 880 см, кутталлаах таһым 1200 см. Манна муус эмиэ олус хойуу. Ленскэйгэ – муус харыыта баар. Уу таһыма 133 см, тыҥааһыннаах таһым 1410 см быһыллар (ити дамбаны аахсыбатахха) Нүүйэҕэ – 115 см, кутталлааҕа 1220 см.

Нүүйэ өрүскэ муус устуута Орто-Наахара таһыгар бэлиэтэнэр. Уу таһыма 770 см, тыҥааһыннаах таһым - 1000 см.

Тээнэҕэ уу таһыма 531 см, кутталлааҕа 600 см.

Республика атын өрүстэригэр муус барбакка турар.

Өрүс уута содула суох ааһарын туһугар генерал-майор А.Горкун салайааччылаах РФ ЫБМ Саха сиринээҕы кылаабынай управлениета Ленскэй оройуонугар үлэлиир.

Муус устар 25 күнүгэр Дьокуускайтан өссө кылаабынай управление икки бөлөҕө Алдаҥҥа уонна Өлүөхүмэҕэ үлэлииллэр.

РФ ЫБМ Саха сиригэр үлэлиир управлениета Ленскэй, Өлүөхүмэ улуус кииннэрин уонна нэһилиэктэрин олохтоохторугар халаан уута чугаһаабытын туһунан иһитиннэрэр. Сыаналаах малы-салы дьиэ кырыыһаларыгар, сүөһүнү-аһы уу ылбат үөһэ сирдэргэ эрдэттэн таһаарарга, докумуоннары, наадалаах малы-салы хомунаргытыгар, олохтоох былаас иһитиннэриилэрин кэтииргитигэр этэллэр.