Кимнээххэ бу квартиралар тиксэллэрин быһаарар 8 киһилээх хамыыһыйа улуус баһылыгын олунньу 6 күнүнээҕи №68-дээх дьаһалынан тэриллибитэ. Онно Үлэ уонна социальнай сайдыы министерствотын Бүлүүтээҕи управлениетыттан, улуус баайы-дуолу бэрийэр структуратыттан, Росреестртэн, административнай комиссиятыттан, ветераннар сүбэлэриттэн бэрэстэбиитэллэр киирбиттэрэ. Хамыыһыйа баһылыгы социальнай политикаҕа солбуйааччы салайыытынан үлэлээтэ.
Уопсайа 18 нэһилиэктэн 90 тыыл ветераныттан дьиэнэн хааччыйар туһунан көрдөһүүлээх сайабылыанньа киирбитэ. Маны хас биирдиилэрин үөрэтэн көрөр сыаллаах сэттэ мунньах ыытылынна. Бигэргэтиллибит балаһыанньанан квартиранан хааччыйыы сүрүн критерийдэрэ: олорор дьиэлэрэ суох уонна көрөр-истэр оҕото суох буолаллара. Онон, докумуоннары көрүү-үөрэтии, сүүмэрдээһин кэнниттэн, комиссия дьиэҕэ-уокка ордук наадыйар ветераннар олорор усулуобуйаларын билсэр сыаллаах нэһилиэктэринэн сырытта. Ол курдук, Орто Бүлүүгэ, Мастаахха, Күүлэккэ, Сыдыбылга уонна Бүлүү куорат иһигэр үлэлээтибит.
Түмүк быһаарыы муус устар 28 күнүгэр таҕыста. Түөрт тыыл ветераныгар квартира биэрэр туһунан комиссия боротокуолун улуус баһылыга С.Н.Винокуров анал дьаһалынан бигэргэттэ.
- Кыайыы күнүн бэлиэтиир дьаһаллар чэрчилэринэн, ыам ыйын 6 күнүгэр күнүс 11 чаастан квартира күлүүстэрин үөрүүлээх быһыыга-майгыга тутуохтара улууска биллэр, ытыктанар ветераннарбыт: Александрова Пелагея Федоровна, Хампа нэһилиэгин олохтооҕо, Наумова Матрена Васильевна, Бүлүү куоратыттан, Николаева Анисия Павловна, II Күүлэт 105 саастаах кырдьаҕаһа, Степанов Аким Алексеевич, Тыымпы нэһилиэгиттэн.
- Кэлэр сылларга улуус салалтата тыыл ветераннарын квартиранан хааччыйыы үлэтин өссө да салгыыр, кэҥэтэр былааннаах. Онон быйыл олохтоммут дьиэҕэ наадыйар ветераннар испиэһэктэрэ инникитин тутуһуллуо. Бүлүү улууһун опыта Саха Республикатын Правительствотын Председателэ Г.И.Данчикова сэҥээриитин ылла. Кини бу бачыымы республика бары улуустарыгар тарҕатарга наадатын бэлиэтээбитэ.
- В.Ф. Тихонова,
- улуус баһылыгын социальнай политикаҕа солбуйааччы
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети