Атлаһы ХИФУ доцена Л.С. Пахомова салайыытынан улуус географияҕа учууталлара оҥордулар. Саҥа таһаарыыны үөрэнээччилэр, тыа хаһаайыстыбатын уонна промышленность тэрилтэлэрин үлэһиттэрэ, туристар уонна кыраайы үөрэтээччилэр үлэлэригэр, үөрэхтэригэр туһаныахтарын сөп.

Араас көрүҥ карталардаах атласка улууспут символын быһаарыыттан саҕалаан историятыгар тиийэ сырдатыллыбыт. Аан тылы улуус баһылыга А.Т. Ноговицын суруйбут.

Үөрүүлээх тэрээһиҥҥэ атлаһы оҥорууга үлэлэспит улуус географ-учууталлара, улуус баһылыга А.Т. Ноговицын, баһылыгы социальнай боппуруостарга солбуйааччы О.Ф. Петрова, үөрэх управлениетын начальнига Т.В. Павлова уонна кииннэммит библиотечнай ситим дириэктэрэ В.А. Платонова кыттыыны ыллылар. А.Т. Ноговицын уонна Т.В. Павлова бу дьоро күнүнэн эҕэрдэлээн тураннар, учууталларга хас биирдиилэригэр махтал суруктары туттартаатылар. В.А. Платонова атлас ис тутулун кытта билиһиннэрдэ.

Онон учууталларбытыгар, Л.С. Пахомоваҕа өссө биир сыаналаах бэлэҕи – атлаһы бэлэхтээбиттэригэр улаханнык махтаныаҕыҥ.