СӨ доруобуйа харыстабылын миниистирин бастакы солбуйааччы Олег Припузов 2014 сыл түмүгүнэн доруобуйа харыстабылын салаатыгар «суол картатын» тус сыаллаах соруктара ситиһиллибиттэрин туһунан иһитиннэрдэ. Ол курдук, эмтиир тэрилтэлэр үлэһиттэрин ахсааныгар уонна хамнастарыгар мониторинг ый аайы ыытыллар.

Мониторинг көрдөрөрүнэн, быһа барыллаан 2014 с. үрдүк үөрэхтээх быраастар ахсааннара – 140,9%, орто сүһүөх медицинскэй үлэһиттэр – 78,6%,  алын сүһүөх медицинскэй үлэһиттэр – 51,7% тэннэстэ.

Судаарыстыбыннай статистика чахчыларынан, Саха сиригэр быраастар орто хамнастара – 69 807 солк., орто сүһүөх медицинскэй үлэһит – 38 599 солк., алын сүһүөх үлэһит – 26 238,8 солк. буолла.

СӨ Судаарыстыбаннай Мунньаҕын народнай депутата Максим Березин өрөспүүбүлүкэтээҕи 2 №-дээх балыыһа үлэһиттэрин хамнастарын туһунан боппуруоһу туруорда.

– Саха сиригэр араас эчэйииттэн өлөр дьонтон – 47 бырыһыаннара, инсультан – 43%, инфарктан 33% бу балыыһаҕа сырдык тыыннара быстар. Тоҕо диэтэххэ, улуустартан кэлэр ыарахан туруктаах ыарыһахтар бары бу балыыһаҕа аҕалыллаллар. Оттон Суһал медицинскэй көмө киинин быраастара өрөспүүбүлүкэ эмчитин орто хамнаһыттан 10 тыһыынчанан кыраны аахсаллар уонна оройуон поликлиникатыгар үлэлиир быраастардааҕар кыра хамнаһы ылаллар. Ол иһин, үчүгэй үлэһиттэр өр тохтооботтор, атын үлэни булан бараллар, – диэтэ С.Березин.

Олег Припузов: «Бу балыыһаҕа быраастар акылааттара атын балыыһалартан атына суох. Оттон хамнас араас төлөбүрдэртэн ааҕыллар. Ким эрэ хас да ставкаҕа үлэлиир, ким эрэ эбии дьуһуурустубалыыр уо.д.а.», – диэн быһаарда.

Манна даҕатан эттэххэ, РФ Доруобуйа харыстабылын министиэристибэтэ эмчит хамнаһын мэктиэлэммит тарифтаах чааһын улаатыннарар, оттон көҕүлүүр чааһын кыччатар соругу туруорда. Боппуруоһу быһаарарга Үлэ уонна социальнай сайдыы министиэристибэтигэр рабочай бөлөх тэрилиннэ. Билигин үлэ төлөбүрүн саҥа тиһигэ (ол иһигэр, суһал көмө иһин эбии төлөбүр) үөрэтиллэр. Олег Припузов: «Үлэ төлөбүрүн саҥа тиһигэр хамнас тарифнай ставката бастакыттан улахан буоларын курдук надбавканы көрө сатыахпыт», – диэтэ.

Доруобуйа харыстабылын профсоюһун Саха сиринээҕи рескомун бэрэссэдээтэлэ Людмила Корнилова бу боппуруос кулун тутар 18 күнүгэр «Социальнай бииргэ үлэлээһин» диэн «төгүрүк остуолга» дьүүллэһиллибитин санатта. Суһал көмө иһин эбии төлөбүр уонна өрөспүүбүлүкэтээҕи 2 №-дээх балыыһа үлэһиттэрин хамнастарын туһунан боппуруос социальнай-үлэ сыһыаннаһыыларын бэрээдэктээһиҥҥэ үс өрүттээх хамыыһыйа рабочай бөлөҕүн мунньаҕар көрүллүөҕэ.