Быйылгы дьаһал «Быһыыны биэриигэ итэҕэстэри суох оҥоруу» диэн лозунунан ыытыллар. Ыарыыны сэрэтэр быһыыны биэрии - СӨ Роспотребнадзор управлениетын уонна Доруобуйа харыстабылын министиэристибэтин үлэлэрин биир сүрүн суолталаах хайысхалара.

Биллэрин курдук, дьон олоҕун быыһыырга уонна ыарыыны эрдэттэн сэрэтиигэ саамай көдьүүстээх ньыманан быһыы буолар. Быһыы көмөтүнэн оспа суох оҥоһуллубута. Куор, тартарар сыстыганнаах ыарыы (столбняк), дифтерия, В гепатит уонна да атын инфекциялар аҕыйаатылар. Быһыы аан дойдуга сыллата 2-3 мөлүйүөҥҥэ тиийэ өлүү тахсыаҕын сэрэтэр.

Нэһилиэнньэ быһыы көдьүүһүн уонна ыарыыны сэрэтии туһунан билбэтиттэн быһыыттан аккаастанар түгэнэ баар. Дьиҥэр, кэлии-барыы элбии турар кэмигэр атын дойдулартан сыстыганнаах ыарыыны киллэрэр куттал кыччаабат.

Роспотребнадзор управлениета иһитиннэрэринэн, Саха Өрөспүүбүлүкэтигэр быһыыны биэрии нэдиэлэтигэр куору уонна тартарар сыстыганнаах ыарыыны утары быһыыны биэриигэ ураты болҕомто ууруллуоҕа.

Быһыыны биэрии Европатааҕы нэдиэлэтин дьаһаллара Роспотребнадзор уонна СӨ Доруобуйа харыстабылын министиэристибэтин былааннарынан ыытыллаллар.

Роспотребнадзор управлениетын 8(4112) 124, 44 60 67 нүөмэригэр эрийдэххитинэ, управление үлэһиттэрэ быһыылар суолталарын туһунан кэпсиэхтэрэ, эһиги ыйытыыларгытыгар хоруйдуохтара.