Эбээн-Бытантайга кырачааннар "Эвинек" бырааһынньыктара буолла

Сандал сааһы көрсөр "Эвинек" бырааһынньык "Хаарчаана" оҕо уһуйааныгар буолан ааста. Былассааккаҕа төрөппүттэр күүстэринэн эбээннии дьэрэкээн чуумнар, буолахтар киэргэтиллэн туруоруллубуттара ааһан эрэр дьон, ыалдьыттар болҕомтолорун тарта. Хас биирдии бөлөх төрөппүттэрэ ис дууһаларыттан кыһаллыбыттара харахха быраҕыллар. Күндү түүлээх диэн, таба тириитэ, муоһа, омук уратытын көрдөрөр оҥоһуктар дэлэгэйдик тэлгэннилэр. Оҕо уһуйаанын иитиллээччилэрэ, иитээччилэрэ, төрөппүттэр бука бары национальнай таҥастаах киин уулуссанан парадтаан кэллилэр.



Бырааһынньык"Уһуктуу" туруоруунан аһылынна (режиссер - Лидия Слепцова). Манна кырачааннар өбүгэлэрбит тымныы кыһыны кытта туруулаһан, этэҥҥэ туораан сандал күнү, айылҕа уһуктуутун уруйдуу көрсөллөрүн дьүһүйэн көрдөрдүлэр. Омук быһыытынан уратыбытын, эбээн фольклорун, сиэрин-туомун, култууратын оҕо кыратыгар ордук кэбэҕэстик ылынар, иҥэринэр диэн иитээччилэр, төрөппүттэр чопчу сыал-сорук туруорунан маннык тэрээһиннэри ыыталлар. Уолаттар улахан киһилии дьоһуннук туттан, кыргыттар нарыннык кынталдьыһан олус кэрэ эҕэрдэ нүөмэрдэри көрдөрөн мустубут дьон биһирэбилин ылыаҕын ыллылар. Саҥа уһуктубут тугутчаан оруолун кырачаан Луиза Оконешникова чэпчэкитик ойон-тэбэн итэҕэтиилээхик толорбута ытыс тыаһынан биһирэннэ. Оттон таба көстүүмнээх кыракый оҕолор үтүрүһэ-үтүрүһэ киирэн, охтон ыла-ыла үҥкүүлээн дайбыттара, "баанньыктаан" туора ойор табалары санатаннар мустубут дьону күллэрдилэр, төрөппүт сүрэҕин сылаанньыттылар.
Национальнай бүлүүдэ куонкуруһугар туох суоҕун этэр судургу буолуо этэ.Өбүгэлэрбит табаттан ылыллар бородууксуйаттан күн көрбүтүн барытын астыыллара, манна 50-тан тахса араас бүлүүдэлээх бөлөхтөр кытта бааллара.

Эбээннии симэммит оҕолору, төрөппүттэри көрөн омукпут уран ойуутун, сиэрин-туомун илдьэ сылдьар, сайыннарар кыахтаах эбиппит диэн киэн тутта, астына көрдүбүт. Манна Түгэһиир эбээннэрин ураты оһуора, мындыр ойуута арылынна.
Спортивнай оонньуулар түһүмэхтэрэ табаһыттар сүлүөттэрин киэниттэн туох да уратыта суох буолан биэрдэ: наартаны ойуу, уучах миинэн сүүрдүү, сыал ытыыта уо.д.а. Кып- кыракый кыргыттар килбиктик, уолаттар харса суох кыттыннылар, күүстэрин-уохтарын, сымсаларын көрдөрдүлэр. Хотторон харах уутун кистээбэккэ хомойуу-абарыы - барыта баара. Ордук уучаҕынан сүүрдүү эрийсиилээхтик барда. Оҕолоругар ыалдьан тула көппүт төрөппүттэр, кыайар эрэ санаалаах сымыһахтарын ыстаабыт кыракый кыттааччылар киирсиилэрэ олус тыҥааһыннаах уонна күлүүлээх буолла.

"Чукичан" бөлөх иитиллээччитэ Сандра Максимова уонна үҥкүү куруһуогун салайааччы Лидия Слепцова һээдьэни этэн эйээрпиттэригэр ким да туора турбата, биир киһилии үктээн эбээн омукпут дьону түмэр, санаатын көтөҕөр, үрүҥ күнү уруйдуур үҥкүүтүгэр астына-дуоһуйа эргийдибит.