Кустуур нэһилиэгэр ыытыллыбыт «Эдэр дьиэ кэргэн" куонкурус үрдүк таһымҥа ыытылынна. Куонкуруска түөрт эдэр, көхтөөх ыал кытынна: Саккырыыртан - Матрена, Николай, Айгылаан, Намыына Баишевтар, Диана, Аян, Александр Прокопьевтар, Рита, Татьяна, Давид, Иван Жирковтар уонна Кустууртан - Сардаана, Алгыстаана, Юрий Винокуровтар. Биэс түһүмэхтээх күрэскэ кыттааччылар бэйэлэрин билиһиннэрэн, физкультураҕа сыһыаннарын, талба талааннарын уо.д.а. көрдөрөн саала иһэ биир кэм ытыс тыаһынан ньиргийэ олордо.

«Эдэр дьиэ кэргэн» күрэс "Эдэр ыал 2015" сүрүн бирииһэ Жирковтарга, "Сайдам ыал", "Көрөөччүлэр биһирэбиллэрэ", Ыччат уонна дьиэ кэргэн политикатыгар министиэристибэ анал бирииһэ - Баишевтар; "Ил - эйэ тыыннаах ыал" - Аян, Диана, Александр Прокопьевтарга, "Дьол уйата ыал" — Винокуровтарга туттарылыннылар.

Дьарҕаалаах нэһилиэгэр, ыччаттар төһө да аҕыйахтарын иһин, барытыгар көхтөөхтөрө көһүннэ. Өрөспүүбүлүкэбитигэр ыччаттар ортолоругар ыытыллар улахан тэрээһиннэр, куонкурустар тустарынан ыччат политикатын салайыыга уонна ырыҥалаан көрүүгэ отдел кылаабынай исписэлииһэ Ирина Иванова сырдатта. СӨ дьиэ кэргэн политикатын туһунан дьиэ кэргэҥҥэ уонна демографическай политикаҕа отдел сүрүннүүр исписэлииһэ Мария Аянитова кэпсээтэ. Миниистири солбуйааччы Алексей Щербаков уопсастыбаннай тэрилтэлэр, чуолаан ыччаттар түмсүүлэрэ граннары ылыыга хайдах үлэлэһэри, өрөспүүбүлүкэбитигэр ордук ханнык хайысхаларга болҕомто уурулларын туһунан сиһилии кэпсээтэ, ыччаттар туһаналларыгар көмө кинигэни бэлэх хаалларда.

Семинардар кэмнэригэр Дьарҕаалаах спортивнай саалатыгар физическэй культура уонна маассабай спорт салалтатын отделын кылаабынай исписэлииһэ Айталина Третьякова нэһилиэнньэҕэ скандинавскай хаамыы эрчиллиилэрин көрдөрдө, үөрэттэ. Ол кэнниттэн оскуола оҕолорун, ыччаттар уонна Ыччат уонна дьиэ кэргэн министиэристибэтин дэлэгээссийэтин икки ардыларыгар волейболга табаарыстыы көрсүһүү буолла. Ыһыылаах-хаһыылаах сэргэх оонньуу түмүгүнэн ыалдьыттарбыт кыайыыны ситистилэр.

Саккырыырга Ыччат министиэристибэтин күннэрин чэрчитинэн А.В. Кривошапкин аатынан Айар дьиэҕэ "Эдэр саас" хаһыат кэррэспэндьиэнин Станислав Иовлевы кытта айар-суруйар дьоҕурдаах оҕолор, улуус олоҕор көхтөөх ыччаттар көрсүһүүлэрэ буолла. «Төгүрүк остуол» тула "Хоту дойду ыччатын бэҕэһээҥҥитэ, бүгүҥҥүтэ, сарсыҥҥыта" диэн тиэмэҕэ истиҥ кэпсэтии буолла. Көрсүһүүгэ манна талааннаах ыччатн, оҕо элбэҕин, ол гынан баран сөмөлүөккэ бырайыас сыаната ыараханынан араас өрөспүүблүкэтээҕи күрэхтэргэ кыайан кыттыыны ылбаттарын, ол түмүгэр оҕолор дьоҕурдара ситэ арыллыбатын эттилэр. Итини таһынан сахалыы киинэлэргэ кэнники кэмөэ олус элбэх “негатив” баар буолбутун, “ватсап”, араас социальнай ситимнэр тарҕаммыт кэмнэригэр дьоҥҥо, ордук оҕолорго куһаҕан сабыдыалы үөскэтэрин уо.д.а. боппуруостары таарыйдылар.

Ити курдук, Эбээн-Бытантай улууһугар аан бастаан маннык улахан састаабынан кэлбит олус наадалаах специалистар оҕолорго, ыччаттарга киэҥ хабааннаах көмө оҥордулар.