Куокуйдар Маай бырааһынньыгын көхтөөхтүк бэлиэтээтилэр

Ыам ыйын 1 күнүгэр Кэбээйи улууһун Куокуй сэлиэнньэтигэр Маай бырааһынньыгын көхтөөхтүк бэлиэтээтилэр. Ол курдук, сарсыардаттан араадьыйанан репортаж бэрилиннэ, ньиргиэрдээх музыка дьон санаатын өрө көтөхтө. Парадка бары түөлбэлэр, тэрилтэлэр сибэккинэн, араас плакаттарынан, шариктарынан симэнэн ырыа, уруй-айхал доҕуһуоллаах хаамтылар.


“Сибэкки” сквергэ түөлбэлэр ырыа-тойук кэһиилээх истиҥ эҕэрдэлэрэ кэлбит дьону-сэргэни сэргэхситтэ. Бииртэн биир тэрилтэлэр саҥа кыайыыларга сирдиир үлэҕэ ситиһиилэрин кэпсээтилэр. Нэһилиэк аҕа баһылыга Егор Павлов үлэ бастыҥнарыгар эҕэрдэ суруктары туттарда. Библиотекарь Варвара Спиридоноваҕа “Улуус култууратын эйгэтигэр үтүөтүн иһин” анал бэлиэни туттада. Тэрилтэлэр араас кэмҥэ үлэлээн ааспыт бэтэрээн үлэһиттэригэр махтал суруктары, бэлэхтэри туттардылар.
Киэһэ култуура дьиэтигэр ”Үчүгэйиэн, сааскы сылаас күннэр" бырааһынньыктааҕы кэнсиэр буолла, маассабай оонньуулар, үҥкүү ыытылыннылар.
Ыам ыйын 2 күнүгэр култуура үлэһиттэрэ, ырыаһыттар Тамара Петрова, Валентина Иванова, Григорий Иванов, Лия Петрова, Александра Иванова, Дмитрий Сметанин, Нина Олесова, Алексей Попов, Оксана Игнатьева ыаллыы сытар Кальвица сэлиэнньэтигэр ырыа-тойук кэһиилээх тиийэн ыалдьыттаатылар. Кальвица үлэһит дьонун бырааһынньыгынан эҕэрдэлээн истиҥ ырыаларын, көрдөөх сценкаларын бэлэхтээтилэр, олохтоохтор махталларын ыллылар.