Сэрии сылларыгар Майаҕа Чурапчытааҕы байыаннай комиссариат баара. Онон Илин эҥэр биэс улууһуттан уонунан тыһыынча саллаат Аллараа Бэстээх бириистэниттэн сэриигэ аттаммыта. Сэриигэ барбыт аартыктарыгар, өрүс биэрэгэр Амма, Таатта, Чурапчы, Уус-Алдан, Мэҥэ-Хаҥалас гербэлэрэ бэлиэлээх сэргэлэрдээх, Умуллубат уоттаах тупсаҕай тутуулаах болуоссат үөрүүлээх аһыллыыта бу күн буолла.

Баатараттан кадет кылааһын үөрэнээччилэрэ автоматтаах араас хамсаныылары оҥорон көрдөрөн дьон-сэргэ сэҥээриитин ыллылар.

Үөрүүлээх миитиҥҥэ оройуон баһылыга Николай Старостин: «Улуу сэрии түгэннэрэ үйэлэргэ умнуллубаттар. Биһиги оройуоммутуттан 3767 эдэр-чэгиэн ыччаппыт бу аартыгынан сэриигэ аттаммыта, кинилэртэн 1855-рэ эрэ алаһа дьиэлэригэр эргиллэн кэлбитэ, 1911-рэ сэрии толоонугар геройдуу охтубута. Күн бүгүн Мэҥэ-Хаҥаласка алдьархайдаах сэрии кэмнэрин тыыннаах туоһулара — сэрии ветераннара - улууспутугар 4, Дьокуускайга - 13, биир Ленинград блокадатын кыттыылааҕа, 45 сэрии кыттыылааҕын огдообото, 30 сэрии тулаайаҕа, 440 тыыл ветерана олороллор. Кинилэри биһиги ытыктыах, үйэтитиэх тустаахпыт», ‒ диэтэ.

Ил Түмэн депутата Александр Романов: «Кыайыы ситиһиллэрин туһугар тыһыынчанан дьоммутун сүтэрэн турабыт. Биһиги ортобутугар баар кырдьаҕастарбыт оҕолоро, сиэннэрэ этэҥҥэ сылдьаннар кинилэри үөрдэ-көтүтэ турдуннар, оттон биһиги кинилэр олохторугар үөрүүнү үксэтиэҕиҥ»,- диэн эттэ.

Сэрии кыттыылааҕа, Японияны утары сэрии ветерана Николай Назаров ааспыт сыллары ахтан-санаан ааста. Улуус байыаннай комиссарын салайааччы Айаал Петров, эдэр көлүөнэ аатыттан Аллараа Бэстээхтээҕи транспортнай техникум студена, Тихэй Океаннааҕы муора флотугар морягынан сулууспалаабыт Дмитрий Соловьев о.д.а. эттилэр. Аллараа Бэстээх бөһүөлэгин баһылыга Георгий Бор үөрүүлээх тэрээһиҥҥэ кыттыыны ылбыт, болуоссаты тутууга күүс-көмө буолбут бар дьоҥҥо махтанна. Бу күн Амма, Таатта, Уус-Алдан, Чурапчы улууһун бэрэстэбиитэллэрэ кэлэн болуоссат үөрүүлээх аһыллыытыгар кытыннылар.

Айан аартыгар тутуллубут болуоссакка бу күн уус-уран самодеятельность коллективтара, оҕолор, ыччаттар сэрии кэминээҕи ырыалара-тойуктара өргө диэри эйээрэн, тэрээһин үрдүк таһымнаахтык ыытыллыбытын туоһулаата.