Улуустааҕы силиэстийэлиир отдел прокуратура иһинэн 2007 сыллаахха тэриллибитэ. 2009 сыллаахха отдел үлэһиттэрэ Аллараа Бэстээххэ көспүттэрэ, анал дьиэтэ суох буоланнар, хонтуора дьиэтин куортамнаһан үлэлээбиттэрэ, 2011 сыллаахха силиэстийэлиир отдел прокуратураттан арахсан, туспа тэрилтэ буолбута.

Саҥа икки мэндиэмэннээх, билиҥҥи усулуобуйаҕа толору эппиэттиир таас дьиэни Дьокуускай куораттааҕы «Универсалстрой» ХЭТ көмөтүнэн 2013 сыллаахха сыбаайата түһэриллибитэ, эһиилигэр көҥдөйө тутуллубуттара. Отдел үлэһиттэрэ Мэҥэ-Хаҥалас, Амма, Уус-Маайа улуустарын, 136 тыһыынча квадратнай километр иэннээх сиринэн-уотунан тарҕанан олорор-үлэлиир уопсайа 60-тан тахса тыһыынча нэһилиэнньэни хааччыйаллар. Күн бүгүн тэрилтэ 6 сотрудниктаах.

Үөрүүлээх тэрээһиҥҥэ СР Силиэстийэлиир управлениетын салайааччы, генерал, юстиция майора Олег Мезрин, солбуйааччыта Игорь Кононюк, улуус баһылыгын бастакы солбуйааччы Павел Сазонов, оройуон Сэбиэтин бэрэссэдээтэлэ Андрей Находкин ыалдьыттаатылар. Саҥа дьиэ символическай күлүүһүн бэдэрээтчит Аритюн Бабитян отдел салайааччытыгар, юстиция подполковнигар Гаврил Матвеевка туттарда.

Олег Александрович коллективы республика үрдүнэн биир бастыҥ үлэлээҕинэн сыаналаата. Үлэлэригэр бэриниилээх сотрудниктар Алдан, Ленскэй оройуоннарын үлэһиттэринээҕэр элбэх холуобунай дьыаланы ситиһиилээхтик тиһэҕэр тиэрдибиттэрин аҕынна уонна салайааччылара Гаврил Матвеев таһаарыылаах үлэтин-хамнаһын иһин анал куонкуруска бастакы миэстэни ылбытын иһитиннэрдэ.