Хаалыктаахтар Майаттан Аллараа Бэстээххэ диэри хаамтылар

Ыам ыйын 24-гэр аан дойду үрдүнэн Скандинавскай хаамыы күнэ бэлиэтэммитэ. Ол чэрчитинэн итиэннэ Улуу Кыайыы 70 сылынан Майа олохтоохторун хаалыктаах хаамыы актыбыыстара, отучча киһи Майаттан, Кыайыы монуменыттан Аллараа Бэстээххэ саҥа тутуллубут Кыайыы болуоссатыгар диэри хаамтылар.


30 ‒тан тахса биэрэстэлээх суолунан хаамыыга саастаах дьон, Павловскайтан кытары баҕалаахтар кытыннылар.
Сэттэ уоннаах Зоя Платонова: «Урукку өттүгэр төбөм, атахтарым ыалдьаннар моһуогурарым, салгын тиийбэт курдук буолара, билигин оннук суох. Быйыл олунньу ыйтан таһырдьа тахсан хаамтым, Чүүйэҕэ диэри, Ураһалааҕынан, уу ааһар турбатынан сылдьабын», ‒ диир.
«Үһүс көлүөнэ» оскуолаҕа доруобуйа чааһын ыытар Людмила Данилова хаалыктаах хаамыы сүһүөххэ олус туһалаах эбит диэтэ. Оттон ветеринария управлениетын специалиһа Марфа Максимова тэрилтэбитинэн бука бары хаамабыт, күн аайы настырыанньалаах сылдьабыт диэн үөрэ-көтө кэпсээтэ.
Хаалыктаах хаамыыга үөрэтэр эдэр эрчимнээх Аграфена Яковлева чөл олоххо угуйар акция- тэрээһин сылтан сыллата ыытыллыаҕа диэн эрэнэрин эттэ. Хаамыы кыттыылаахтара Аллараа Бэстээххэ диэри илистибэккэ, бэрт чэпчэкитик хааман тиийбиттэрэ сөхтөрдө.