Саҥа квартиралар хаһаайыннарынан Айталина Лебедева, Руслан Маселко, Иванна Атласова, Владимир Заровняев, Мария Марсанова, Валентина Стручкова, Василий Захаров, Наталья Колесова уонна Роман Шарин буоллулар. Ыччаттар ылбыт дьиэлэрэ туспа сирдээх-уоттаах буолан, инникитин оҕуруот олордорго, хаһаайыстыба тэринэргэ табыгастаах. Күн-бүгүн тулаайах оҕолору дьиэнэн хааччыйыы программатынан улууска 67 ыччат хабыллан дьиэлэннэ.

Саҥа дьиэ аһыллыытыгар алгысчыт Петр Тихонов сахалыы сиэринэн аал-уоту оттон, үрдүк айыылартан көрдөстө. Улуус баһылыга Николай Старостин, «Аллараа Бэстээх» МТ баһылыга Георгий Бор, Ил Түмэн депутаттара Юрий Баишев, Александр Романов уонна саҥа квартира хаһаайына Владимир Заровняев кыһыл лиэнтэни үөрүүлээх быһыыга-майгыга быстылар. Улуус баһылыгын Махтал суруктара «Жилстройинвест» тэрилтэ үлэһиттэригэр Константин Поповка, Дьулустаан Скрыбыкиҥҥа туттарылыннылар.