Нэдиэлэни үөрүүлээхтик арыйыы «Кыталык» Культура дьиэтигэр буолла. Улуус баһылыга Борис Попов мустубут дьону эҕэрдэлээтэ, судаарыстыба дьиэ кэргэҥҥэ туһаайан үгүс элбэх үлэни ыытарын бэлиэтээтэ, дьоллоох нус-хас олоҕу баҕарда. Уонна Ньурба куорат баһылыга Алексей Иннокентьевы кытта элбэх оҕолоох эдэр ийэлэргэ мэтээллэри туттарда.

Тэрээһиҥҥэ чугастааҕы нэһилиэктэр көхтөөх, инники күөҥҥэ сылдьар ыаллара оҕолорун, сиэннэрин кытта тус холобурдарынан үлэни-үөрэҕи, чөл олоҕу өрө туталларын көрдөрөн дьиэ кэргэттэр парадтарыгар, араас тэрээһиннэргэ кытыннылар. Саха аһын эгэлгэтэ «Саха маанылаах сандалыта» быыстапкаҕа туруорулунна, тэрээһин киэргэлинэн буолла.

ЗАГС дьиэтигэр Антоновка ытык ыалларын - Валентина Михайловна уонна Дмитрий Иннокентьевич Тимир сыбаайбаларын бэлиэтээтилэр. Бу ыал 65 сыллаах эйэ дэмнээх олохторо эдэр дьон Ньургуйаана уонна Виктор Юмшановтар ыал буолар күннэригэр үтүө холобур буолла, дьолу түстүүр үөрүүнү үксэттэ.

Хас биирдиибит дьиэ кэргэн диэн өйдөбүлү нус-хас, бөҕө тирэхтээх олоҕу, дьоллоох оҕо сааһы кытта ситимниир. Төһөнөн элбэх ыал иллээхтик, уопсай сыаллаах-соруктаах олорор да, соччонон уопсастыбабыт чөл, бигэ туруктаах буолара саарбаҕа суох.