Соторутааҕыта улуус баһылыга Анатолий Григорьев бу улахан эппиэтинэстээх дьыалаҕа ылсарга соруммут, биһиэхэ холобур буолуон сөптөөх өссө биир ыалы кытта көрсөн кэпсэттэ.

Саргылаана Владимировна уонна Владимир Владимирович Дормидонтовтар иккиэн Сунтаардааҕы байыаннай комиссариат үлэһиттэрэ, бэйэлэрэ үс уол оҕолоохтор. Онон маҥнай кыыс оҕо иитэ ыларга санаммыттар. Республикатааҕы «Берегиня» оҕо дьиэтигэр тиийэн, үс оҕону - Мэҥэ-Хаҥаластан төрүттээх биир уол уонна икки кыыс оҕону иитэ ыларга быһаарыммыттар.

Анатолий Васильевич «Төрөппүт сылааһыттан, тапталыттан маппыт кырачааннарга ийэ, аҕа дьолун биллэрэргит хайҕабыллаах. Маннык үтүө быһыыгыт обществоҕа холобур буолар!», - диэн этэн туран, көрүүтэ-харайыыта суох үс оҕону иитэ ылбыттарын туоһулуур 55 №-дээх дастабырыанньаны үөрүүлээх быһыыга туттарда, оҕолорго бэлэх биэрдэ.

Опека отделыгар үтүө холобуру көрдөрөр дьиэ кэргэҥҥэ оҕо саадын боппуруоһун быһаарарга эттэ. 

Тимур ИВАНОВ, улуус баһылыгын көмөлөһөөччүтэ