"Сахаэнерго" ААУо хоту улуустарга хонтуруолу күүһүртэ

“Сахаэнерго” ААУо хоту өрүстэр муустан босхолонор кэмнэригэр ыксаллаах балаһыанньаҕа бэлэм буолуу бэрээдэгинэн үлэлиир. Энергохампаанньа улуустааҕы салааларыгар тыҥааһыннаах быһыы-майгы үөскүүр түбэлтэтигэр, саахалы туоратыыга 126 биригээдэ, 588 үлэһит, 39 техника, 4 суудуна үлэлииргэ бэлэмнэр.

Билигин энергетиктэр ууга барыан сөптөөх Дьааҥы, Усуйаана, Муома, Абый, Үөһээ Халыма, Орто Халыма уонна Аллараа Халыма улуустарыгар баар 28 эбийиэккэ күнүстэри-түүннэри дьуһуурустубалаан, хонтуруолу күүһүртүлэр. Ол курдук, ууну хачайдыыр тэрили, уматык уонна саппаас чааһы бэлэмнээтилэр. Итиэннэ Анкундинка уонна Индигир өрүстэри туоруур анкернай остуолбалары, уот ситимнэрин чинчийдилэр.

“Сахаэнерго” ААУо ыксаллаах быһыыга-майгыга отделын салайааччы Борис Сивцев этэринэн, быйыл балаһыанньа этэҥҥэ, уу таһыма кутталлаах кээмэйтэн намыһах. Ол эрээри, быар куустан олорор табыллыбат. Халыма, Дьааҥы, Индигир өрүстэргэ көмүөл урукку дьыллардааҕар хойутаан уһунна.