«Балыыһалары сабар туһунан буолбакка, бу тэрилтэлэргэ ким үлэлиэҕин, баар усулуобуйаҕа хаачыстыбалаах өҥөнү оҥоруохха сөбүн эбэтэр ол кыаллыбатын ырытабыт», - диэн РФ Госдуматын доруобуйа харыстабылыгар бэрэссэдээтэлин солбуйааччы Сергей Дорофеев эттэ. 

Швецияҕа стажировкаҕа сылдьыбыт, кэлиҥҥи сылларга Эбээн-Бытантай, Муома, Аллайыаха улуустарыгар үлэлээбит эдэр медик Назар Петров Эбээн-Бытантай улууһун холобуругар олоҕуран видео-киинэ көмөтүнэн сылы эргиччи суол суох буоларын, күн-дьыл туругуттан тутулуктанан авиарейстэр тохтотулалларын, медицинскэй тэрил тиийбэтин кэпсээтэ. Олох туһугар быраастар ыарахан эпирээссийэлэри оҥорорго күһэллэллэрин эттэ.

СР доруобуйа харыстабылын миниистирин солбуйааччы Людмила Вербицкая федеральнай стандарт быһыытынан 2 тыһ.тахса киһилээх Эбээн-Бытантай улууһугар эмп үлэһиттэрин 1,5 ыстаапката көрүллэрин туһунан эттэ. «Республика бюджетыттан үбүлэнэн 91 үлэһиттээх оройуоннааҕы киин балыыһа толору үлэлиир», - диэтэ кини. 

Ыраах, суола-ииһэ суох улуустарга учаастактааҕы балыыһалары үлэлэлэтии төһө сөптөөҕүй? Онуоха тэрилтэлэр баар нуормаларга, ирдэбиллэргэ эппиэттиэхтээхтэр, ол иһигэр специалистарын таһымнарынан. Экспердэр этэллэринэн, каадырынан хааччылыы сытыытык турар кыһалҕа. «Земскэй луохтуур» бырагырааманан эдэр быраастар хоту үлэлии тиийбиттэр. Быраас специализациятыгар ураты болҕото ууруллар. Телемедицина баар кыһалҕа сороҕун быһаарыан сөбүн эттилэр.

Икки күн устата Федерация Сэбиэтин чилиэннэрэ, Госдума депутаттара куорат уонна тыа сирин доруобуйа харыстабылын тэрилтэлэригэр сырыттылар. Кулун тутар 11 күнүгэр Дьокуускайга хотугу улуустарга аҕыйах миэстэлээх учаастактааҕы балыыһаларга анаммыт "төгүрүк остуол" буолла.

«Билигин үлэлии турар тирэх сокуон чуолкайданыахтаах, чопчуланыахтаах. Бырабыыталыстыбаҕа, доруобуйа харыстабылын министиэристибэтигэр ону өйдүүллэрэ буолуо дии саныыбын. Учаастактааҕы балыыһаларга регион боломуочуйатын таһымынан туспа позициялары быһаарыахтаахпыт. Биллэн турар, онуоха үбүлээһин, араас бырагыраамаларга кыттыы боппуруостара толору толкуйданыахтаахтар. Баар кыһалҕа сотору кэминэн быһаарыллыа диэн эрэнэбин», - диэтэ Дорофеев.

Василий Кононов хаартыскаҕа түһэриилэрэ.