“Төгүрүк остуолу” салайан ыыппыт СӨ предпринимательствотын уонна туризмы сайыннарыы министрэ Екатерина Кормилицына Саха сирин хотугу үгүс улуустарыгар туризм салаата сайдыбатаҕын, инникитин сайдарга кыахтар баалларын бэлиэтээтэ. 

«Центр стратегических исследований» ГАУ салайааччыта Валентина Кондратьева Саха сиригэр 2025 сылга  диэри арктическай туризм сайдыытын концепциятын бырайыагын билиһиннэрдэ. Дьааҥы, Өймөкөөн улуустарыгар туризм баар эбит буоллаҕына, Орто Халыма, Үөһэ Халыма, Абый, Эбээн-Бытантай улуустарыгар бу салаа сайдыбатаҕын эттэ.

“Өлүөнэ очуостара” паарка директора Василий Калитин эбэнки общинатын дьылҕатын боппуруоһун көтөхтө: “Паарка территориятын улахан аҥара эбэҥки общинатын сиринэн буолар. Кинилэри өйүүр сыалтан этно-туризмы сайыннарыахха наада”, -- диэн бэлиэтээтэ.

Архангельскай куораттан кэлэ сылдьар «Русская Арктика» Национальнай паарка директора Виктор Кузнецов СИА корреспонденыгар кыттан санаатын үллэһиннэ: “Саха сирин климата тыйыс. Ол эрээри Саха сиригэр былыр-былыргыттан дьон олорон кэлбитэ. Бу курдук уустук усулуобуйаҕа туризмы сайыннаран эрэргит хайҕаллаах дьыала. Мин Атласовтар уһаайбаларыгар уонна Арбугаевтар комплекстарыгар сырыттым, олус астынным”, -- диэн кини эттэ.

Дьааҥы улууһун баһылыгын бастакы солбуйааччы  Николай Корнилов улууска туризм сайдыытын туһунан кэпсээтэ: “Дьааҥыга сылга 200 тахса турист кэлэн барар. Киһилээх Хайабытыгар сылдьаллар. Билиҥҥитэ икки туристическай оператор үлэлиир. Бу салааны сайыннарыахпыт диэн эрэллээхпит”, -- диэн кини СИА корреспонденыгар эттэ.