- Ватсабынан суруйсууга ураты тыл (сленг) үөскээтэ, олохсуйда даҕаны. Бу ыччат төрөөбүт тылынан сөпкө суруйуутугар, тыл суолтатын таба туһаныытыгар охсуулаах.

Аҕам уонна орто саастаах дьон, үксүбүт, ватсабынан төһө да суруйсубуппут иһин, сурук бэлиэтин туруора, тылы сөпкө суруйа сатыырга кыһаллабыт. Оттон ыччаттар туох баар тылы кылгаталларын таһынан, ойуунан-бичигинэн быһаараллар. Аҕыйаҕы холобурдаатахха, киһи аатын кыра буукубаттан суруйаллар, махтанабын диэн оннугар -- спс, оннук буолбат дуо – бтта, оннук буолуо – буо, эбэтэр ээх, сөп (туохха эмэ сөбүлэһэри биллэрэр тыл) -- Ок. дииллэр. Онтон да атын элбэх. Оттон “Ок” диэн тылы биһиги туохха эмэ соһуйдахпытына, сөхтөхпүтүнэ туттабыт эбээт. Холобур, “Ок! Охто сыстым”, “Ок! Хата киһибит бэйэтинэн тиийэн кэллэ” , о.д.а.Маннык суруйсууттан ыччат төрөөбүт тылын сыыйа умнан барыан сөп диэн долгуйабын”, -- диир Ольга Новгородова. Кэпсэтии кыттыылаахтара төрөөбүт төрүт тылы харыстыыр туһуттан нэһилиэккэ тугу оҥоруохха, тэрийиэххэ сөбүн кэпсэттилэр.

Общественнай түмсүү көхтөөх кыттааччыларыттан биирдэстэрэ Айталина Сивцева, “Кэскил” балаҕаҥҥа учууталлар үөрэнээччилэрин кытта тиһиктээхтик кэлэллэрин, манна уруоктары, күрэхтэһиилэри тэрийэллэрин, сэргэх көрсүһүүлэр буолалларын бэлиэтээтэ. Ааспыт сылтан манна сахалыы остуол оонньууларыгар бэртээхэй күрэхтэһиилэр ыытыллар буолбуттара кэрэхсэнэрин, дьон-сэргэ сөбүлээн оонньуурун этэр. Маннык тэринэн үлэлээһин Хамаҕатта ыччатыгар үчүгэйдик дьайарыттан киэн туттар. Олохтоохтор уонна учууталлар ыччат төрөөбүт тылынан ыраастык саҥарарын, литератураны умсугуйан ааҕарын күүһүрдэр туһуттан онно аналлаах тэрээһиннэри өссө элбэтэр, ураты сүүрээни киллэрэн сэргэх күрэхтэһиилэри кыттыһан тэрийэр былааннаахтар.